Украинадаги урушда икки нафар тожикистонлик ҳалок бўлди. Улар Россия колонияларида жазо ўтаётган эди

Россиянинг Украина билан урушида тожикистонликлар ҳалок бўлди, деб хабар бермоқда Asia Plus. Улар Россия колонияларида жазо муддатини ўтаётган эди.

Ўтган ўн кун ичида Тожикистоннинг Хатлон вилоятида Украинадаги урушда ҳалок бўлган икки кишининг дафн маросими бўлиб ўтган. Қариндошларининг сўзларига кўра, улар Россия колонияларида жазо муддатини ўтаётган эди, аммо Украина ҳудудидаги жанглар зонасига бориб қолган. Гап 22 ёшли Бобоазиз Тўйдиев ва 28 ёшли Манучеҳр Шодов ҳақида бормоқда.

Тўйдиевнинг оила аъзолари айтишича, у Россияда 2021 йил сентябрида наркотиклар сақлаш айблови билан қўлга олинган ва олти йиллик қамоққа ҳукм қилинган.

Шодов айнан қандай айблов билан қамалгани борасида тафсилотлар йўқ. Дўстлари айтишича, у Санкт-Петербургдаги қамоқхонада сақланган.

Икки йил аввалги маълумотларга кўра, Россия тергов изоляторлари ва қамоқхоналарида қарийб 10 минг нафар Тожикситон фуқаролари бўлган.

Аввалроқ Украина қуролли кучлари бош штаби расмийси, бригада генерали Алексей Громов Россия ўз йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини айтганди.

Шунингдек, Россия колонияларидаги маҳбуслар 2 ой ичида рекорд даражада камайиб кетгани, бу улар урушга ёлланаётгани билан боғлиқ бўлиши мумкинлиги хабар берилган эди.

Украина Қуролли кучлари Махсус операция кучлари қошидаги Миллий қаршилик маркази маълумотларига кўра, Россия Украинадаги махсус операциясига қамоқхоналарда Вагнер хусусий ҳарбий компанияси томонидан ёлланган ўн минглаб аскарларни жўнатмоқда. Шу пайтгача улар жами 23 минг нафар маҳбусни ёллаган.