Rossiyaning Sverdlovsk viloyatida deputat Vyacheslav Vegner ayol mahbuslarni Ukrainadagi urushga yuborishni taklif qildi.
Deputatning so‘zlariga ko‘ra, koloniyalardan birida saqlanayotgan rossiyalik ayollar unga shunday murojaat qilgan.
“Sverdlovsk viloyatidagi IK-6-da jazo muddatini o‘tayotgan ayollar guruhi menga murojaat qildi. Ular maxsus harbiy operatsiya zonasiga signalchi, shifokor va hamshira sifatida borishga, harbiylarimizga yordam berishga tayyorligini bildirdi”, — deydi deputat.
Uning so‘zlariga ko‘ra, urushda “faqat ayollarning qo‘lidan keladigan ish ko‘p, erkaklarga o‘n marta tushuntirish”dan ko‘ra, ayollarga yaralarni birlamchi davolash usulini o‘rgatish osonroq.
“Bunga yaradorlarni jang maydonidan olib chiqish, yaralarni birlamchi davolash, bog‘lash kiradi. Ukrainadagi urushda yaradorlar borligini tushunamiz, ularning soni sezilarli darajada oshgan”, — deya tushuntirdi Vegner.
Qayd etilishicha, “Vagner” xususiy harbiy kompaniyasi rahbari Yevgeniy Prigojin deputatning taklifini qo‘llab-quvvatlagan.
“Men sizning fikringizga mutlaqo qo‘shilaman. Ular nafaqat hamshira va signalchilikka, balki snayper ham bo‘lishi mumkin. Biz bu yo‘nalishda ishlayapmiz. Qarshilik bor, lekin buni siqib chiqaramiz, deb o‘ylayman”, — deydi u.
“Vagner” qanday guruh?
Ko‘plab G‘arb OAVlari Vagner guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.
U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.
Izoh (0)