KXSHT bosh kotibi: “Alyansga yangi davlatlarni qabul qilish masalasi muhokama qilinmayapti”

Kollektiv Xavfsizlik Shartnomasi Tashkilotiga (KXSHT) yangi a’zolarni kiritish masalasi muhokama qilinmayapti, uyushmani kengaytirish bo‘yicha qadamlar uning samaradorligini oshirishga xizmat qilishi kerak, dedi bosh kotib Stanislav Zas “RIA Novosti” agentligiga.

“Yo‘q, hozir bu masala muhokama qilinmayapti. Unga soddalashtirilgan tarzda yondashishning ham hojati yo‘q, son ortidan quvishning keragi yo‘q. Son uchun emas, sifat uchun ishlashimiz kerak”, — deydi Zas.

Tashkilot a’zolari muntazam ravishda qo‘shma mashg‘ulotlar o‘tkazib turadi. Sentabr oyi o‘rtalarida Qirg‘izistonda bo‘lib o‘tishi kerak bo‘lgan “Mustahkam birodarlik-2022” mashg‘ulotlari bekor qilinishi fonida bu davlat KXSHTdan chiqishi haqida xabarlar paydo bo‘ldi. Respublika rasmiylari bu ma’lumotni rad etib, manyovrlar keyinroqqa ko‘chirilganini qo‘shimcha qildi. “Bizga KXSHT juda kerak. U terrorchilik tahdidlariga qarshi to‘liq kafolat beradi va mamlakatimiz milliy xavfsizligi manfaatlariga javob beradi”, — degan Qirg‘iziston Qurolli kuchlari Bosh shtabi boshlig‘i Erlis Terdibekov.

Armaniston va Ozarbayjon o‘rtasidagi mojaroning keskinlashuvi va KXSHTning vaziyatni harbiy yo‘l bilan hal qilish variantini qo‘llab-quvvatlamagani fonida Yerevanning ham alyansdan chiqishi haqida xavotirlar paydo bo‘ldi. Respublikada shunday chaqiriqlar bilan norozilik namoyishlari ham o‘tkazildi.