Rossiya Xavfsizlik Kengashi raisi o‘rinbosari Dmitriy Medvedev Telegram’da barcha britaniyalik siyosatchilarni “kamdan-kam uchraydigan ikkiyuzlamachilar” deb atadi va bunga ularning Rossiya—Ukraina o‘rtasidagi ehtimoliy muzokaralar haqidagi ritorikasini misol qilib keltirdi.
U Britaniya bosh vaziri Rishi Sunakning Rossiya Ukraina hududidan o‘z qo‘shinlarini olib chiqmaguncha, muzokaralar olib borish mumkin emasligi haqidagi so‘zlariga shama qildi. Medvedevning ta’kidlashicha, yana shu britaniyaliklar muzokara olib borish-bormaslikni ukrainaliklarning o‘zi hal qilishini aytmoqda.
“Bu yolg‘on, ikkiyuzlamachilik va haddan ortiq surbetlik bo‘lmoqda”, — dedi Medvedev.
Shuningdek u Britaniyaga Folklend (Malvin) orollarini argentinaliklarga qaytarishni taklif qildi. “Folklend — Britaniya emas, Argentina”, — deya postini yakunlagan Medvedev.
15-noyabr kuni Sunak Buyuk Britaniya Ukrainaga Rossiya bilan muzokaralar uchun “eng kuchli pozitsiyani” berishga harakat qilayotganini va bu muzokaralarni o‘tkazish qarorini Kiyevga qo‘yib berish kerak, deb hisoblashini aytgandi.
“Ukrainaliklarga qarab, sizning mamlakatingiz va infratuzilmangiz bombardimon qilinayotgan bir paytda muzokaralar olib borishingiz kerak, deb aytish biroz insofsizlik bo‘ladi”, — degan Britaniya bosh vaziri.
Izoh (0)