Нидерландия бош вазири Марк Рютте мамлакатнинг қулдорлик ва унинг оқибатларидаги роли учун узр сўради. Унинг Гаагадаги Миллий архивда сўзлаган нутқи ҳукумат сайти томонидан эълон қилинди.
«Тўғри, ҳозир яшаётганлардан ҳеч ким қулчиликда айбдор эмас. Лекин шу нарса ҳам ҳақиқатки, Голландия давлати бутун тарих мобайнида қулликка дучор қилинган одамлар ва уларнинг авлодларига етказилган азоб-уқубатлар учун масъулдир», — деди Рютте. У «асрлар давомида Голландия давлати ва унинг вакиллари» қулчиликни рағбатлантиргани ва ундан манфаат олганини таъкидлади.
Нидерландия номидан сўралган узр мамлакатнинг мустамлакачилик билан боғлиқ ўтмиши қайта кўриб чиқилаётган бир пайтда, шунингдек, келаси йил қулдорлик бекор қилинганига 160 йил тўлиши арафасида янгради.
XVII асрда Нидерлания ва унинг мустамлакаси бўлган ҳудудлар Нидерландия мустамлака империясини ташкил қилган. XVIII асрга келиб, у Гвианани, Индонезияни ҳамда Ҳиндистон, Сейлон ва Формоза оролидаги факторияларни, шунингдек, бошқа ҳудудларни ўз ичига олган эди.
1660—1670 йилларда Нидерландия Шимолий Америкадаги ер-мулкларини, шу жумладан, ҳозирги Нью-Йоркни Буюк Британияга бериб юборди, XIX асрда эса унинг фойдасига Сейлондан ва Жанубий Африкадаги Кап мустамлакасидан воз кечди.
Қулдорлик 1863 йил июлига қадар мамлакат иқтисодиётининг бош омилларидан бири бўлиб келган.
Ҳозирда Нидерландия таркибига Кариб денгизидаги Бонайре, Синт-Эстатиус ва Саба ороллари, шунингдек, алоҳида мақом (ўз-ўзини бошқарувчи давлат тузилмаси)га эга бўлган Аруба, Кюрасао ва Синт Мартен ҳам киради.
Нидерландияда, бошқа Европа мамлакатларида бўлгани каби, мустамлакачилик ўтмиши ва қулдорлик ҳақидаги баҳслар 2020 йилда АҚШда Black Lives Matter ҳаракати пайдо бўлганидан кейин қайтадан бошланди. Хусусан, 2020 йил июлида Нидерлания Марказий банки унинг фаолияти собиқ мустамлакаларда қулчиликни қўллаб-қувватлаш билан боғлиқ бўлган-бўлмаганини аниқлашга қарор қилди. Ундан аввалроқ эса Англия банки ўз офисидан қул савдосига алоқадор раҳабрлар портретларини олиб ташлашга қарор қилганди.
Изоҳ (0)