Qashqadaryo SSB poliklinikada shifokorlar polda o‘tirib ishlayotgani aytilgan xabarga munosabat bildirdi

Nasafnews nashrida Qashqadaryo viloyati Qarshi tumani tibbiyot birlashmasiga qarashli 54-sonli oilaviy poliklinika binosida shifokorlarga sharoit yo‘qligi, yaqinda ta’mirlanganiga qaramasdan hech qanday jihozlar ajratilmagani, ayrim xonalarda xodimlar polda o‘tirib ishlayotgani, isitish tizimi nosozligi haqida xabar e’lon qilindi. Viloyat Sog‘liqni saqlash boshqarmasi holatga munosabat bildirdi.

Aniqlanishicha, 54-oilaviy poliklinikaning 2 qavatli binosi 1993-yilda qishloq vrachlik ambulatoriyasi uchun qurilgan. 2017-yilda qishloq oilaviy poliklinikasi maqomi berilgan.

Oilaviy poliklinika binosi 2021—2022-yillar davomida 943 million so‘mga rekonstruksiya qilingan. Rekonstruksiya loyiha smetalariga qattiq jihozlar bilan ta’minlash kiritilmagan. Binoda 34 ta xona mavjud bo‘lib, ulardan 5 tasidan foydalanilmaydi, ayni paytda bo‘sh turibdi. Boshqa xonalar oldindan mavjud bo‘lgan qattiq jihozlar bilan jihozlangan.

“O‘rganish jarayonida polda o‘tirib ishlash holati umuman kuzatilmadi, bunga sabab yo‘qligi qayd etildi”, — deyiladi xabarda.

Ta’kidlanishicha, 25-aprelda tuman tibbiyot birlashmasi tomonidan poliklinikani yangi qattiq jihozlar bilan ta’minlashda amaliy yordam so‘rab tuman hokimligiga xat kiritilgan. Binoda gaz qozonlari orqali isitish tizimi mavjud, unda muammo aniqlanmagan.