“Hyatt Regency mehmonxonasi qurilish narxidan arzonga emas, 1,7 barobar qimmatga sotildi” – Davaktiv 

Davlat aktivlarini boshqarish agentligi 10-noyabr kuni Hyatt Regency Tashkent mehmonxonasining 100 foiz davlat ulushini “Abu Dhabi Uzbek Investment” MCHJ kompaniyasiga 87 million AQSH dollariga sotish bo‘yicha kelishuvga erishilganini xabar qilgandi. Ijtimoiy tarmoqlar faollari mehmonxonaning sotilgan narxi uning qurilish xarajatlaridan (205 million dollar deyilgan) ancha arzonligi to‘g‘risida xabar tarqatgan va bu muhokamalarga sabab bo‘lgandi. Agentlik direktori Akmalxon Ortiqov “Daryo” muxbiriga bergan intervyusida mehmonxona qurilishi va sotilishi bilan bog‘liq jarayonlarga izoh berdi.

Akmalxon Ortiqovning aytishicha, bu yerda asosiy nuqta mehmonxonaning qurilish davridagi valyuta kursi bilan bugungi kurs tafovutiga bog‘liq.

Ma’lumki, mehmonxona qurilishi 2012-yilda boshlangan bo‘lib, 2016-yil oxirida yakunlangan. Mehmonxona “Poytaxt qurilish va xizmatlari” MCHJ balansiga tasdiqlangan texnik-iqtisodiy asoslantirish(TEO)da ko‘rsatilgan qiymatga asosan (1 dollar – 2 ming 750 so‘m, valyuta kursi bozor bahosini ifodalamaydi) qabul qilingan va uning umumiy qiymati 566  milliard so‘mni tashkil etgan. Xarajatlarning asosiy qismi milliy valyuta so‘mda amalga oshirilgan.

Xalqaro baholash standartlariga muvofiq, mehmonxona biznes sifatida baholanadi va Mehmonxonani baholash xalqaro umume’tirof etilgan baholash yondashuvlari asosida amalga oshirilgan.

Investorning narx taklifi mehmonxonaning baholash qiymatidan ancha yuqori, konsultantning mehmonxona indikativ narx diapazoniing yuqori qismiga kiradi.

Bunda, amortizatsiya ta’siri darajasini ham inobatga olish kerak: hisob siyosatiga asosan bino va inshootlarga o‘rtacha 20 foizni, mebel jihozlarga esa o‘rtacha 70 foizni tashkil etadi.

Mehmonxonaning daromadi har bir xona narxi va xonalar bandligi kabi omillarga bog‘liq. Mehmonxonaning bandligiga mamlakatga sayyohlar oqimini to‘xtatgan pandemiya davri ham ta’sir ko‘rsatdi. Amalda mehmonxona biznesi va turizm 2021-yil oxiridagina tiklana boshladi.

Mehmonxona faoliyat boshlaganidan hozirgi kunga qadar o‘z segmentidagi eng yaxshi mehmonxonalardan biri bo‘lib, barcha majburiyatlarini bajarib kelmoqda, xususan 2020-yilga qadar sof foydasining 30 foizini, 2021-yilda esa 50 foizini budjetga o‘tkazgan.

Hozirgi geosiyosiy vaziyatga ko‘ra, sayyohlar oqimining ijobiy prognozi, shuningdek, xalqaro mehmonxona brendlarining kirib kelishi tufayli mintaqadagi raqobatni rivojlanishi, mehmonxonaning kelgusida kutilayotgan pul oqimlarini hisoblashda o‘z aksini topgan.

2017-yildagi valyuta siyosatining liberallashtirilishi (chet el valyutasini erkin sotish va sotib olish) bo‘yicha amalga oshirilgan islohotlar natijasida milliy valyutaning kursi o‘zining adolatli qiymatiga moslashgan, xususan, 2013-yildagi AQSH dollari/so‘m kursi o‘rtacha 1 AQSH dollari uchun 2 ming 97 so‘mni tashkil etgan bo‘lsa, ushbu ko‘rsatkich 2022-yilning 10 oyida o‘rtacha 1 AQSH dollari uchun 11 ming 10 so‘m bo‘lgan.

Mehmonxonaning to‘lov qiymati joriy kurs bilan hisoblanganda 974  milliard so‘mdan oshadi, bu qurilish xarajatining milliy valyutadagi qiymati (566  milliard so‘m, ushbu xarajatlar 2013-yilgi valyuta ayirboshlash kursi bo‘yicha so‘mda tan olingan)ga nisbatan 1,7 barobarga yuqori demakdir.

Shu bilan birga, Investor tomonidan to‘lov summasiga qo‘shimcha ravishda 12 million AQSH dollari hajmida mehmonxonani rivojlantirish uchun investitsiya kiritish taklifini ham bergan.

Akmalxon Ortiqov, Davlat akativlarini boshqarish agentligi direktori.

“Abu Dhabi Uzbek Investment” MCHJ QK investitsiya fondi bo‘lib, uning asosiy aksiyadori (75 foiz) 1971-yilda tashkil etilgan Abu-Dabi taraqqiyot jamg‘armasi hisoblanadi. So‘nggi 50 yilda jamg‘arma dunyoning 97 ta davlatidagi loyihalarga sarmoya kiritgan. Investitsiyalar hajmi qariyb 41 milliard AQSH dollarini tashkil etadi. “Abu Dhabi Uzbek Investment” MCHJ QK 2022-yil sentabrda Samarqand infratuzilmasini modernizatsiya qilish uchun 300 million AQSH dollari ajratgan, shuningdek, 757 ta kichik va o‘rta biznes subyektlarini qariyb 50 million AQSH dollari miqdorida moliyalashtirgan. Kompaniyaning boshqaruv raisi Abu Dabi amirligining hukmron qirollik oilasi a’zosi, Birlashgan Arab Amirliklari Prezidenti devonining rahbari, shuningdek, “Manchester Siti” futbol klubi egasi Mansur ibn Zoid Al Nahayon hisoblanadi. Davlat ulushini sotib olish faqatgina xorijiy investorning o‘z kapitali hisobidan amalga oshiriladi. To‘lov oldi-sotdi shartnomasi imzolangandan so‘ng bir yo‘la amalga oshiriladi”, – dedi agentlik rahbari.