Angren shahri hokimi Alisher Raimovga tegishli, deb aytilayotgan audioyozuv tarqaldi. Unda hokimning bo‘ralab so‘kayotgani va bir tadbirkorni “qamoqqa tiqib qo‘ygani” aytilgan.
Toshkent viloyati hokimligi “Effect.uz” tomonidan e’lon qilingan audiodagi ovoz egasi haqiqatan ham Angren shahar hokimi Alisher Raimov ekanligini tasdiqladi. Holat bo‘yicha viloyat hokimligi Odob-axloq komissiyasining yig‘ilishi chaqirilgan.
Qayd etilishicha, komissiya Angren shahri hokimining xatti-harakatlarini Vazirlar Mahkamasining “Davlat fuqarolik xizmatchilari tomonidan odob-axloq qoidalariga rioya etilishini ta’minlash bo‘yicha qo‘shimcha chora-tadbirlar to‘g‘risida”gi qarori me’yorlari bo‘yicha ko‘rib chiqadi.
“Komissiya xulosasi asosida viloyat hokimi tegishli qaror qabul qiladi. Komissiya xulosasi va viloyat hokimining qarori rasmiy veb saytimizda e’lon qilinadi”, — deyiladi viloyat hokimligi xabarida.
Ma’lumot uchun, Alisher Raimov Angren shahriga 2022-yilning mayidan buyon rahbarlik qilib kelmoqda.
Izoh (0)