Senat Qirg‘iziston bilan chegarani delimitatsiya qilish to‘g‘risidagi shartnomani va Andijon suv ombori to‘g‘risidagi bitimni ratifikatsiya qilish haqidagi qonunlarni ma’qulladi. Bu haqda Senat axborot xizmati xabar berdi.
Ta’kidlanishicha, 18-noyabr kuni Oliy Majlis Senatining o‘ttiz beshinchi yalpi majlisida senatorlar O‘zbekiston va Qirg‘iziston o‘rtasidagi muhim ikki tomonlama shartnomalarni ratifikatsiya qilish to‘g‘risidagi qonunlarni ko‘rib chiqdi.
Muhokamada tegishli vazirlik va idoralar, shuningdek, Andijon, Farg‘ona va Namangan viloyatlari hokimliklari rahbarlari, xalq deputatlari mahalliy kengashlari deputatlari, ekspertlar ham ishtirok etdi.
Yalpi majlisda senatorlar “O‘zbekiston Respublikasi bilan Qirg‘iziston Respublikasi o‘rtasida o‘zbek-qirg‘iz Davlat chegarasining alohida uchastkalari to‘g‘risidagi Shartnomani ratifikatsiya qilish haqida”gi hamda “O‘zbekiston Respublikasi Hukumati bilan Qirg‘iziston Respublikasi Vazirlar Mahkamasi o‘rtasida Andijon (Kampirobod) suv omborining suv resurslarini birgalikda boshqarish to‘g‘risidagi Bitimni ratifikatsiya qilish haqida”gi O‘zbekiston Respublikasi qonunlarini batafsil muhokama qildi.
Senatorlar davlat chegarasi bilan bog‘liq nizoli masalalarning hal etilishi mamlakat milliy xavfsizligini ta’minlashda muhim ahamiyat kasb etishini ta’kidladi, chunki bu chegaradagi nizolarning oldini olish va noqonuniy savdoga samarali qarshi kurashish imkonini beradi. O‘z navbatida, Andijon (Kampirobod) suv omboridan birgalikda foydalanish minglab fermer xo‘jaliklarini suv bilan uzluksiz ta’minlashda ishonchli kafolatlar yaratadi.
Bundan tashqari, mazkur hujjatlarning qabul qilinishi transchegaraviy suv resurslaridan oqilona va o‘zaro manfaatli foydalanishga xizmat qilishi, ikki tomonlama hamkorlikni sifat jihatidan yangi bosqichga olib chiqishga imkon berishi ta’kidlandi. Batafsil muhokama yakunlari bo‘yicha Senat mazkur qonunlarni ma’qullash to‘g‘risida qarorlar qabul qildi.
Avvalroq Qirg‘iziston parlamenti O‘zbekiston bilan chegara to‘g‘risidagi shartnomani hamda Andijon suv omboridan foydalanishga oid hujjatni ratifikatsiya qilgani haqida xabar berilgan edi. Hujjatlarni 64 nafar deputat qo‘llab-quvvatlagan, 19 nafari qarshi ovoz bergan.
O‘zbekiston tarafidan esa deputatlar qabul qilgan hujjatlarni Senat ma’qullashi, so‘ng prezident imzolasa, tomonlar bir-birini xabardor qilgach, shartnomalar rasman kuchga kirishi ma’lum qilingan.
Mavzuga doir:
- Abdulla Aripov O‘zbekiston va Qirg‘izistonning bahsli yer masalalariga aniqlik kiritdi
- “Biror odam norozi bo‘lmaydi” – Abdulla Aripov O‘zbekistonning Qirg‘iziston bilan chegara chizig‘idan qancha xonadon ko‘chirilishini aytdi
- “Qirg‘iziston ‘G‘ovasoy’ daryosining oqimiga to‘sqinlik qilmaslik va suvini ifloslantirmaslik majburiyatini olgan” — Abdulla Aripov
Izoh (0)