Украинанинг бутун ҳудуди бўйлаб ҳаво тревогаси эълон қилинди

11 октябрь куни эрталаб Украинанинг Винница вилоятидаги Ладижин иссиқлик электр станциясига иккита Shahed-136 камикадзе-дронлари ҳужум қилди, бу ҳақда вилоят маъмурияти раҳбари Сергей Борзов маълум қилди.

«Жануб» ҳаво қўмондонлиги хабарига кўра, 11 октябрга ўтар кечаси Николаев вилоятида бешта, Одесса вилоятида эса учта Shahed-136 дронлари ҳаво ҳужумига қарши мудофаа тизими томонидан йўқ қилинган.

11 октябрь куни эрталаб Украинанинг аксарият вилоятларида яна ҳаво тревогаси эълон қилинди. Кейинроқ эса бутун Украина ҳудуди бўйлаб ҳаво тревогаси ҳақида хабар берилди.

Украина шаҳарларига ҳужум

Россия президенти Владимир Путин 10 октябрь куни эрталаб Украина шаҳарларининг ўққа тутилиши Керчь бўғозидаги Қрим кўпригида содир бўлган портлашга жавоб бўлганини айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.

Украина президенти Владимир Зеленский Россия қўшинлари бир кунда Украина шаҳарларига қарата 84 та ракета учирганини маълум қилди, шуларнинг 43 таси ҳаво ҳужумига қарши мудофаа тизими томонидан уриб туширилган. Бундан ташқари, шу куни Украинага 24 та учувчисиз учар қурилма ҳужум қилган, 13 таси уриб туширилган.

Украина фавқулодда вазиятлар давлат хизмати берган сўнгги маълумотларга кўра, 11 октябрь куни эрталаб ҳолатига Россия ҳужумидан кейин Киев, Львов, Суми, Тернополь ва Хмельницкий вилоятларида 300 та аҳоли пункти электр таъминотисиз қилмоқда. 3500 дан ортиқ шаҳар ва қишлоқларда электр таъминоти аллақачон тикланган. 19 киши ҳалок бўлиб, яна 105 киши жароҳатлар олган.