10-oktabr kuni ertalab berilgan raketa zarbalari tufayli, Ukrainaning kamida 1307 ta aholi punkti elektrsiz qoldi. Bu haqda mamlakat Favqulodda vaziyatlar davlat xizmati xabar berdi.
Elektr ta’minoti Sumi (766 ta aholi punkti), Lvov (353), Ternopol (169), Kiyev (13) va Xmelnitskiy (6) viloyatlarida uzilgan.
Favqulodda vaziyatlar davlat xizmati bergan so‘nggi ma’lumotlarga ko‘ra, 10-oktabr kungi o‘qqa tutishlar oqibatida 14 kishi halok bo‘lib, 97 kishi jarohatlangan.
Ukraina prezidenti Vladimir Zelenskiy Rossiya qo‘shinlari bir kunda Ukraina shaharlariga qarata 84 ta raketa uchirganini ma’lum qildi, shularning 43 tasi havo hujumiga qarshi mudofaa tizimi tomonidan urib tushirilgan. Bundan tashqari, shu kuni Ukrainaga 24 ta uchuvchisiz uchar qurilma hujum qilgan, 13 tasi urib tushirilgan. Rossiya Mudofaa vazirligi mudofaa, energetika va aloqa obyektlariga hujum qilinganini aytdi, biroq fuqarolik obyektlari ham o‘qlar yomg‘iri ostida qolgan. Reuters qayd etishicha, bu urush boshlanganidan buyon Rossiyaning eng yirik havo hujumi bo‘lgan.
Energetika infratuzilmasiga o‘q yog‘dirilgani va zarar ko‘rgani tufayli, Ukraina o‘z energiya tizimini barqarorlashtirish uchun 11-oktabrdan Yevroittifoqqa elektr energiyasi eksportini to‘xtatib turishga qaror qildi.
Rossiya prezidenti Vladimir Putin 10-oktabr kuni ertalab Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Mavzuga doir:
Izoh (0)