Tadbirkor va investor, DST Global investitsiyaviy fondi egasi milliarder Yuriy Milner Twitter orqali ma’lum qilishicha, u oilasi bilan 2022-yil yozida Rossiya fuqaroligidan voz kechgan. Biznesmenning vakili ushbu ma’lumotni Forbes jurnaliga tasdiqlagan.
“Men oilam bilan 2014-yilda, Rossiya Qrimni bosib olganidan keyin butunlay bosh olib ketgandim. Shu yil yozda esa Rossiya fuqaroligidan voz kechish jarayonini rasman yakunladik”, — dedi biznesmen.
Yuriy Milner 1999-yilda Isroil pasportini olib, u yerda bir necha yil yashagan, so‘ng AQSHga ko‘chib ketgan.
Forbes 2022-yilda Milnerning boyligini 7,3 milliard dollarga baholagandi. Biznesmen jurnal talqini bo‘yicha eng boy rossiyaliklar ro‘yxatida 15-o‘rinni egallagan.
Yuriy Milner, asli rossiyalik bo‘lgan boshqa ba’zi tadbirkorlar, masalan, Pavel Durov bilan bir qatorda Forbes’dan ularni rossiyalik biznesmenlar deb atamaslikni so‘ragandi.
Sentabr boshida rossiyalik va armanistonlik tadbirkor va investor Ruben Vardanyan Rossiya fuqaroligidan voz kechib, tan olinmagan Tog‘li Qorabog‘ Respublikasiga ko‘chib o‘tganini ma’lum qilgandi.
Shuningdek, iyun oyida Freedom Finance sarmoya kompaniyasi asoschisi Timur Turlov Rossiya fuqaroligidan voz kechib, Qozog‘iston pasportini olganini ma’lum qilgandi.
Izoh (0)