Shanxay hamkorlik tashkiloti sammitining birinchi kuni doirasida 15-sentabr kuni qator tadbirlar bo‘lib o‘tdi. “Daryo” nashri kun davomida sodir bo‘lgan e’tiborga molik jarayonlarni bir joyga to‘pladi.
Erta tongdan xorijiy davlat rahbarlari birin-ketin Samarqand shahriga kela boshladi. Tojikiston, Turkmaniston, Rossiya, Ozarbayjon, Belarus, Turkiya hamda Qozog‘iston prezidentlari, shuningdek, Pokiston va Hindiston bosh vazirlari Samarqandga yetib keldi.
Kun davomida O‘zbekiston prezidenti Shavkat Mirziyoyev qator davlat rahbarlari bilan uchrashuv o‘tkazdi. Jumladan, dastlab Samarqanddagi Kongress markazida Xitoy raisi Si Szinpinni rasmiy kutib olish marosimi bo‘lib o‘tdi. Shavkat Mirziyoyev Si Szinpinni “Do‘stlik” ordeni bilan mukofotladi.
Shavkat Mirziyoyev va Si Szinpin qo‘shma bayonot imzoladi. Shuningdek, oliy darajadagi tashrif doirasida 15 ta hujjat imzolandi.
Bundan tashqari, O‘zbekiston prezidenti Pokiston bosh vaziri Shahboz Sharif, Ozarbayjon prezidenti Ilhom Aliyev, Tojikiston prezidenti Emomali Rahmon, Belarus prezidenti Aleksandr Lukashenko, Turkmaniston prezidenti Serdar Berdimuhamedov, Qirg‘iziston prezidenti Sadir Japarov hamda Rossiya prezidenti Vladimir Putin bilan muzokaralar o‘tkazdi.
Shuningdek, Eronning SHHTga a’zo davlat maqomini olish uchun majburiyatlari to‘g‘risidagi memorandum imzolandi.
Belarus prezidenti Aleksandr Lukashenko SHHT bosh kotibi Chjan Min bilan uchrashuv o‘tkazib, Belarus Shanxay oilasining to‘laqonli a’zosiga aylanish vaqti kelganini aytdi.
Xitoy—Mo‘g‘uliston—Rossiya mamlakatlari o‘rtasida uch tomonlama muloqot bo‘lib o‘tdi.
Sammit o‘zi ishini ertaga — 16-sentabr kuni davom ettiradi.
Izoh (0)