Тошкентда 45,3 фоиз ўсиш, Бухорода 10,7 фоиз қисқариш: Августда Ўзбекистоннинг товар экспорти қандай ўзгарди?

Иқтисодий тадқиқотлар ва ислоҳотлар маркази август ойидаги ишбилармонлик фаолиятини таҳлил қилди. Бу ҳақда Марказ матбуот хизмати «Дарё»га маълум қилди.

Товар экспорти

Давлат божхона қўмитаси маълумотларига кўра, йил бошидан 31 августга қадар товарлар экспорти ҳажми ўтган йилнинг мос даврига нисбатан 23 фоизга ошган.

Товарлар экспорт ҳажмининг сезиларли ўсиши Самарқанд (35,9 фоиз), Қашқадарё (35,9 фоиз), Андижон (35,1 фоиз), Наманган (30,7 фоиз), Сирдарё (27,7 фоиз) вилоятларида ва Тошкент шаҳрида (45,3 фоиз) қайд этилди.

Ўзбекистон экспортининг ўсиши саноат маҳсулотлари, озиқ-овқат маҳсулотлари, кимё ва қишлоқ хўжалиги маҳсулотлари экспортининг ўсиш суръатлари билан изоҳланади.

Товар экспортининг қисқариши Бухоро (10,7 фоиз), Сурхондарё (7,3 фоиз) вилоятларида ва Қорақалпоғистонда (16,1 фоиз) кузатилди.

Экспорт ҳажмининг камайиши Бухоро вилоятида пахта толасининг ички бозорга йўналтирилганлиги билан изоҳланади.

Қорақалпоғистонда эса бу ҳолат пластмасса ва ундан тайёрланган маҳсулотлар, ип-калава ва фармацевтика маҳсулотлари экспортининг камайиши билан, Сурхондарё вилоятида мева-сабзавот маҳсулотлари экспортининг камайиши билан боғлиқ.

Аввалроқ Ўзбекистонда инвестициялар учун энг жозибадор тармоқлар аниқлангани ҳақида хабар берилганди.