Rossiya, katta ehtimol bilan, Ukrainaning keyingi hujumlari oldini olish uchun o‘zining Qrimdagi harbiy-havo kuchlarini yoyib yuboradi. Bu haqda NATOning 22-avgustga tegishli maxfiy hisobotiga tayanib, Business Insider xabar berdi.
Hujjatga muvofiq, Rossiya Qurolli kuchlari samolyotlarni yo‘qotishda davom etmaslik uchun Qrimdan allaqachon o‘nta qiruvchi samolyotini ko‘chirib o‘tkazgan, bular — oltita Su-35 va to‘rtta MiG-31.
Shu bilan birga, deyiladi hisobotda, Qrimda Sevastopol tashqarisida joylashgan Belbek “Ukraina janubida va Qora dengiz osmonida aviatsiya ko‘magini ta’minlab turishda Rossiya uchun eng muhim aerodrom” bo‘lib qolmoqda. NATO ma’lumotlariga ko‘ra, ushbu aerodromda hozirgacha taxminan 32 ta qiruvchi qolmoqda. Bular asosan Su-27, bundan tashqari, Su-35S va MiG-31BM.
Shuningdek, NATOdagilar fikricha, Rossiya Ukrainaning, shu jumladan, uchuvchisiz uchar qurilmalar yordamidagi hujumlariga qarshi turish uchun Qrimda “yer-havo” sinfidagi taktik raketalari sonini oshirgan.
Avgust boshidan buyon Qrimda dronlar portlab ketgani va hujum qilgani haqida ko‘p marta xabar berilgan. Chunonchi, 9-avgust kuni Novofedorovka qishlog‘i yaqinidagi Saki harbiy aerodromida ketma-ket portlashlar yuz bergandi.
Rossiya Mudofaa vazirligi yong‘in xavfsizligi talablari buzilishi sababli Saki aerodromida “bir qancha aviatsiya o‘q-dorilari yonib ketgani” haqida ma’lum qildi. Muassasa aviatsiya texnikasiga zarar yetganini rad etdi.
Ukraina Qurolli kuchlari Bosh shtabi Saki aerodromidagi portlashlardan keyin bir kunda to‘qqizta Rossiya samolyoti yo‘q qilinganini ma’lum qildi. Saki aerodromidagi portlashlar uchun javobgarlik Ukraina tomoni rasman o‘z zimmasiga olmadi.
Amerikaning Planet Labs kompaniyasi aerodromning sun’iy yo‘ldoshdan olingan tasvirlarini e’lon qildi, ularda vayronagarchiliklar izlarini ko‘rish mumkin. G‘arb razvedkasi ma’lumotlariga ko‘ra, 9-avgust kungi hujum oqibatida Rossiya Qora dengiz floti dengiz aviatsiyasi jangovar samolyotlarining yarmidan ayrilgan.
Izoh (0)