Ukrainadagi “maxsus harbiy operatsiya” Uchinchi jahon urushiga yo‘l qo‘ymaslik maqsadida o‘tkazilmoqda. Bu haqda Fransiyaning LCI telekanaliga bergan intervyusida Rossiya Xavfsizlik kengashi raisi o‘rinbosari Dmitriy Medvedev ma’lum qildi, deb yozadi Meduza.
“Uchinchi jahon urushi yuz bermasligi uchun biz hamma narsani qilishimiz kerak, mamlakatimiz siyosati ham aynan shunga qaratilgan”, — dedi Medvedev. Uning aniqlik kiritishicha, agar Ukraina NATOga qo‘shilib, so‘ng Rossiya hududlariga qarshi harbiy operatsiya boshlaganida, Uchinchi jahon urushi boshlangan bo‘lishi mumkin edi.
Medvedev, shuningdek, “maxsus operatsiya” “maksimal darajada ehtiyotkorona, mo‘tadil variant bo‘yicha borayotgani” va Rossiya harbiylari faqat Ukraina Qurolli kuchlariga qarshi jangovar harakatlar olib borayotganini aytdi.
“Agar vaziyat boshqacha bo‘lganida edi, tushunganingizdek, bu harbiy kampaniya ancha tezroq yakunlangan bo‘lishi mumkin edi. Ammo Ukraina uchun butunlay boshqacha oqibatlar yuzaga kelgan bo‘lardi. Uning infratuzilmasi batamom vayron bo‘lardi, qaror qabul qilish markazlari, hokimiyat organlari yo‘q qilinardi va hokazo. Biz bunday yo‘ldan bormadik”, — dedi u.
Medvedev ta’kidlashicha, hozir Rossiya tomonidan yadro quroli qo‘llash uchun asoslar yo‘q. Uning eslatishicha, bu faqat birovning yadroviy zarbasiga yoki “davlatning hayotiga tahdid soluvchi boshqa xatti-harakatlarga” javoban amalga oshishi mumkin.
Dmitriy Medvedev Ukrainaga bostirib kirilganidan keyin jamoatchilik makonida eng tajovuzkor urush himoyachilaridan biriga aylandi. Shuningdek, u G‘arb va Ukraina siyosatchilarini haqorat qilib, Ukraina kelajakda “dunyo xaritasida mavjud bo‘lishiga” shubha bildirgandi.
Avvalroq Medvedev Rossiyaning Ukrainadagi xatti-harakatlari nima sababdan urush emas, maxsus harbiy operatsiya ekanini tushuntirar ekan, ushbu operatsiya nishonlari cheklangani, zarbalar esa faqat harbiy obyektlarga berilayotganini aytgandi.
Izoh (0)