НАТО ҳисоботи: Россия Қримга ҳужумлардан кейин унинг ҳудудидан 10 та қирувчи самолётини олиб кетган

Россия, катта эҳтимол билан, Украинанинг кейинги ҳужумлари олдини олиш учун ўзининг Қримдаги ҳарбий-ҳаво кучларини ёйиб юборади. Бу ҳақда НАТОнинг 22 августга тегишли махфий ҳисоботига таяниб, Business Insider хабар берди.

Ҳужжатга мувофиқ, Россия Қуролли кучлари самолётларни йўқотишда давом этмаслик учун Қримдан аллақачон ўнта қирувчи самолётини кўчириб ўтказган, булар — олтита Су-35 ва тўртта МиГ-31.

Шу билан бирга, дейилади ҳисоботда, Қримда Севастополь ташқарисида жойлашган Белбек «Украина жанубида ва Қора денгиз осмонида авиация кўмагини таъминлаб туришда Россия учун энг муҳим аэродром» бўлиб қолмоқда. НАТО маълумотларига кўра, ушбу аэродромда ҳозиргача тахминан 32 та қирувчи қолмоқда. Булар асосан Су-27, бундан ташқари, Су-35С ва МиГ-31БМ.

Шунингдек, НАТОдагилар фикрича, Россия Украинанинг, шу жумладан, учувчисиз учар қурилмалар ёрдамидаги ҳужумларига қарши туриш учун Қримда «ер-ҳаво» синфидаги тактик ракеталари сонини оширган.

Август бошидан буён Қримда дронлар портлаб кетгани ва ҳужум қилгани ҳақида кўп марта хабар берилган. Чунончи, 9 август куни Новофедоровка қишлоғи яқинидаги Саки ҳарбий аэродромида кетма-кет портлашлар юз берганди.

Россия Мудофаа вазирлиги ёнғин хавфсизлиги талаблари бузилиши сабабли Саки аэродромида «бир қанча авиация ўқ-дорилари ёниб кетгани» ҳақида маълум қилди. Муассаса авиация техникасига зарар етганини рад этди.

Украина Қуролли кучлари Бош штаби Саки аэродромидаги портлашлардан кейин бир кунда тўққизта Россия самолёти йўқ қилинганини маълум қилди. Саки аэродромидаги портлашлар учун жавобгарлик Украина томони расман ўз зиммасига олмади.

Американинг Planet Labs компанияси аэродромнинг сунъий йўлдошдан олинган тасвирларини эълон қилди, уларда вайронагарчиликлар изларини кўриш мумкин. Ғарб разведкаси маълумотларига кўра, 9 август кунги ҳужум оқибатида Россия Қора денгиз флоти денгиз авиацияси жанговар самолётларининг ярмидан айрилган.