WP: Zelenskiy fevralda urushni to‘xtatish uchun iste’foga chiqishga tayyorligini bildirgan

Ukraina prezidenti Vladimir Zelenskiy fevral oxirida, Rossiya harbiy operatsiyasining ilk kunlarida, agar bu jangovar harakatlarni to‘xtatishga yordam bersa, iste’foga chiqishini istisno qilmagan. Bu haqda The Washington Post gazetasining Rossiya qo‘shinlarining Ukrainaga kiritilishiga yarim yil to‘lishi munosabati bilan e’lon qilingan “Kiyev uchun jang” maqolasida aytiladi, deb yozadi “RBK”.

WP ma’lumotlariga ko‘ra, g‘arblik mansabdorlar bilan jangovar harakatlar boshlanishini muhokama qilar ekan, Zelenskiy o‘z lavozimiga tirmashib olmasligini aytgan. “Men hokimiyatni qo‘limda saqlab qolishga intilmayapman. Agar masala mening ketishim va shu tariqa qirg‘inni to‘xtatishimdan iborat bo‘lsa, men faqat “ha” deyman. Hoziroq ketaman. Men siyosatga buning uchun kirganim yo‘q, agar bu urushni to‘xtatadigan bo‘lsa, ketaman”, — deya gazeta Ukraina yetakchisi gaplaridan iqtibos keltirgan.

WP eslatishicha, qurolli nizoning dastlabki kunlarida G‘arb mamlakatlari vakillari Zelenskiyga evakuatsiya qilishni taklif etgan, ammo u bunday imkoniyatni rad etgan. Maqolada aytilishicha, prezident, agar Kiyevni tark etsa, poytaxtni Rossiya qo‘shinlariga jangsiz topshirgan bo‘lishiga, bu esa Ukraina “hokimiyati zudlik bilan qulashi”ga olib kelgan bo‘lishiga ishongan.

Ukraina prezidenti ofisi rahbari Aleksey Arestoviсhning so‘zlariga ko‘ra, evakuatsiya qilish haqidagi maslahatlar prezident qo‘riqlov xizmati xodimlaridan ham kelib tushgan: ular Zelenskiyga dastlab poytaxtni tark etib, so‘ng Ukraina g‘arbiga ketishni taklif qilgan. “Sizning ofisingiz — nishon”, — degan qo‘riqlov xodimi, u Kiyevdagi bunkerni ham xavfli deb hisoblagan. 1-mart kuni bunkerda olingan suratni CNN muxbiri Mettyu Chens e’lon qilgandi.

25-fevral, harbiy operatsiya boshlanganidan keyin bir kun o‘tib, Rossiya Mudofaa vazirligi Kiyev qisman qamal qilinganini ma’lum qildi. Bir oydan keyin idora Rossiya “Donbass respublikalarini ozod qilish bo‘yicha operatsiyaning yakuniy bosqichini olib borish uchun sharoitlar yaratish” uchun Kiyev yo‘nalishidagi “qo‘shinlarni rejali qayta guruhlashi” haqida e’lon qildi.

WP yozishicha, Zelenskiy o‘zi jangovar harakatlarning birinchi kunlarida suhbatlashgan g‘arblik mansabdorlarning ba’zilari “shunchaki nizo iloji boricha tezroq tugashi va uning ma’muriyati esa Rossiyaga taslim bo‘lishini xohlagan” degan shubhada bo‘lgan. “Menga qo‘ng‘iroq qilganlarning hech biri biz omon qolishimizga ishonmagandi. Ular Ukrainaga ishonmagani uchun emas, balki Rossiya Federatsiyasi yetakchisining shaytonga tenglashtirilishi tufayli”, — deya nashr Ukraina prezidenti gaplarini keltirib o‘tdi.

Oxir-oqibat, deb yozadi WP, Zelenskiy AQSH va Yevropa mamlakatlari hukumatlari vakillarini Ukrainani qo‘llab-quvvatlash zarurligiga ishontira oldi. Xususan, u Germaniya kansleri Olaf Sholsni “bu devorni qulatish”ga (1987-yilda Berlin devorini olib tashlashga chaqirgan AQSH prezidenti Ronald Reyganning iborasiga ishora) va Rossiya “Yevropani parchalab yuborishi”ga yo‘l qo‘ymaslikka chaqirdi. Germaniyalik siyosatchilar bilan suhbatda Zelenskiy “bu urushdan keyin uyalib qolmaslik uchun” qo‘ldan kelgan hamma narsani qilish kerakligida turib olgan, deyiladi maqolada.

Jangovar harakatlar boshlanganidan keyin G‘arb mamlakatlari ukrainalik harbiylarga o‘lim qurollari va boshqa mudofaa mahsulotlarini yetkazib berish hajmini oshirdi. Iyun oxirida AQSH prezidenti Jo Bayden aytganidek, 50 dan ortiq davlat Kiyevga harbiy ko‘mak berish majburiyatini olgan.