Rim papasi Darya Duginani urushning “begunoh qurboni” deb atadi. Ukraina elchisi tajovuzkor va jabrlanuvchining farqiga borish kerakligini aytdi

Rim papasi Fransisk Ukrainadagi urushga yarim yil bo‘lgani munosabati bilan murojaat e’lon qilib, u tez orada tugashiga umid bildirdi, shuningdek, urushning xunini begunoh odamlar to‘layotganini ta’kidladi, deb yozadi Meduza.

“Juda ko‘p ukrainalik va rossiyalik bolalar yetim bo‘lib qoldi. Yetimlik millat tanlamaydi — bu bolalar, rus yoki ukrain bo‘lishidan qat’i nazar, ota yoki onalaridan ajralgan”, — dedi pontifik.

O‘z murojaatida Rim papasi faylasuf Aleksandr Duginning qizi Darya Duginani ham tilga oldi: “Moskvada avtomobiliga o‘rnatilgan bomba portlashidan halok bo‘lgan bechora qiz haqida o‘ylayapman. Urushning xunini begunohlar to‘lamoqda! Kelinglar, bu haqda o‘ylab ko‘rib, bir-birimizga aytaylik: urush — bu tentaklik deb”.

Ukrainaning Vatikandagi elchisi Andrey Yurash pontifikning murojaatini tanqid qilib, uning Darya Dugina urushning “begunoh qurboni”ga aylangani haqidagi gaplarini “hafsalani pir qiluvchi” deb atadi.

“Tajovuzkor va jabrlanuvchi haqida bitta toifa sifatida gapirib bo‘lmaydi. Rossiya imperializmi rahnamosini qanday qilib begunoh qurbon deyish mumkin? Uni ruslar o‘ldirib, uni jafokash qilib ko‘rsatmoqchi va urushga qalqon qilmoqchi bo‘lgan”, — deb yozdi diplomat Twitter’da.

Darya Dugina — faylasuf Aleksandr Duginning qizi — 20-avgust kuni Podmoskovyeda avtomobili portlab ketishi oqibatida halok bo‘ldi. Rossiya Federal xavfsizlik xizmati uning o‘ldirib ketilishini Ukraina maxsus xizmatlari uyushtirganini, qotillik ijrochisi esa Ukraina fuqarosi Natalya Vovk bo‘lganini ma’lum qildi. U 12 yoshli qizi bilan Rossiyaga kelib, Dugina yashaydigan uyda xonadon ijaraga olgan va uni kuzatgan, uning avtomobili masofadan turib portlatilganidan keyin esa Estoniyaga jo‘nab ketgan. Kiyev Duginaning o‘ldirilishiga aloqadorligini rad etmoqda.