Qrim hukumati Zelenskiyning yarim orolni qaytarib olish rejalarini “bema’ni fikr” deb atadi

Qrim parlamenti vitse-spikeri Vladimir Bobkov Ukraina prezidenti Vladimir Zelenskiyning yarim orolni Ukraina tarkibiga qaytarish rejalarini “bema’ni fikr” deb atadi. Bu haqda “RBK” xabar bermoqda.

“Bu bayonotlarning barchasi — bema’ni valdirashlar. Yadro maqomiga ega buyuk davlatdan nimanidir olib qo‘yish, nimanidir zo‘rlik bilan tortib olish — bu bema’ni fikr. Buni hatto bu bayonotlarni beradiganlar ham anglaydi, ba’zan ularning aqli joyidaligiga shubha uyg‘onsa ham”, — dedi Bobkov.

23-avgust kuni “Qrim platformasi” onlayn-sammitida Zelenskiy Ukraina Qrimni “boshqa mamlakatlar bilan maslahatlashmagan holda, o‘zi to‘g‘ri deb bilgan har qanday vositalar yordamida qaytarib olishi”ni aytgandi.

Ukraina yetakchisi so‘zlariga ko‘ra, Kiyevda allaqachon yarim orolni qayta tiklash strategiyasi bor, u Qrim Ukraina tarkibiga o‘tganidan keyin hukumat tomonidan amalga oshiriladi. Bosh vazir Denis Shmigal Kiyevning maqsadi — Qrimni “gullab-yashnayotgan bog‘ga aylantirish” ekanini aytgandi.

Avvalroq Turkiya prezidenti Rajab Toyyib Erdo‘g‘on Kiyevdagi “Qrim platformasi” onlayn-sammiti ishtirokchilariga yo‘naltirilgan videomurojaatida Qrim yarim oroli Ukrainaga qaytarilishi zarurligini ma’lum qilgani xabar berilgandi. “Xalqaro huquqqa muvofiq, Qrim Ukrainaga qaytarilishi kerak, u Ukrainaning ajralmas qismidir”, — dedi Turkiya rahbari.

Moskva 2014-yilgi referendumdan keyin Qrimning kimga tegishliligi masalasi muhokama qilinmasligini bir necha marta aytib o‘tgan. “Qrim xalqi qaror qabul qildi va ovoz berdi. Masala tarixiy jihatdan yopildi”, — degan edi Putin 2016-yilda. Rossiya tashqi ishlar vaziri o‘rinbosari Andrey Rudenko 2019-yilda Rossiya Qrimning tegishlilik masalasini hech qanaqa maydonda muhokama qilmasligini aytgandi.