WP: Зеленский февралда урушни тўхтатиш учун истеъфога чиқишга тайёрлигини билдирган

Украина президенти Владимир Зеленский февраль охирида, Россия ҳарбий операциясининг илк кунларида, агар бу жанговар ҳаракатларни тўхтатишга ёрдам берса, истеъфога чиқишини истисно қилмаган. Бу ҳақда The Washington Post газетасининг Россия қўшинларининг Украинага киритилишига ярим йил тўлиши муносабати билан эълон қилинган «Киев учун жанг» мақоласида айтилади, деб ёзади «РБК».

WP маълумотларига кўра, ғарблик мансабдорлар билан жанговар ҳаракатлар бошланишини муҳокама қилар экан, Зеленский ўз лавозимига тирмашиб олмаслигини айтган. «Мен ҳокимиятни қўлимда сақлаб қолишга интилмаяпман. Агар масала менинг кетишим ва шу тариқа қирғинни тўхтатишимдан иборат бўлса, мен фақат «ҳа» дейман. Ҳозироқ кетаман. Мен сиёсатга бунинг учун кирганим йўқ, агар бу урушни тўхтатадиган бўлса, кетаман», — дея газета Украина етакчиси гапларидан иқтибос келтирган.

WP эслатишича, қуролли низонинг дастлабки кунларида Ғарб мамлакатлари вакиллари Зеленскийга эвакуация қилишни таклиф этган, аммо у бундай имкониятни рад этган. Мақолада айтилишича, президент, агар Киевни тарк этса, пойтахтни Россия қўшинларига жангсиз топширган бўлишига, бу эса Украина «ҳокимияти зудлик билан қулаши»га олиб келган бўлишига ишонган.

Украина президенти офиси раҳбари Алексей Арестовичнинг сўзларига кўра, эвакуация қилиш ҳақидаги маслаҳатлар президент қўриқлов хизмати ходимларидан ҳам келиб тушган: улар Зеленскийга дастлаб пойтахтни тарк этиб, сўнг Украина ғарбига кетишни таклиф қилган. «Сизнинг офисингиз — нишон», — деган қўриқлов ходими, у Киевдаги бункерни ҳам хавфли деб ҳисоблаган. 1 март куни бункерда олинган суратни CNN мухбири Мэттью Чэнс эълон қилганди.

25 февраль, ҳарбий операция бошланганидан кейин бир кун ўтиб, Россия Мудофаа вазирлиги Киев қисман қамал қилинганини маълум қилди. Бир ойдан кейин идора Россия «Донбасс республикаларини озод қилиш бўйича операциянинг якуний босқичини олиб бориш учун шароитлар яратиш» учун Киев йўналишидаги «қўшинларни режали қайта гуруҳлаши» ҳақида эълон қилди.

WP ёзишича, Зеленский ўзи жанговар ҳаракатларнинг биринчи кунларида суҳбатлашган ғарблик мансабдорларнинг баъзилари «шунчаки низо иложи борича тезроқ тугаши ва унинг маъмурияти эса Россияга таслим бўлишини хоҳлаган» деган шубҳада бўлган. «Менга қўнғироқ қилганларнинг ҳеч бири биз омон қолишимизга ишонмаганди. Улар Украинага ишонмагани учун эмас, балки Россия Федерацияси етакчисининг шайтонга тенглаштирилиши туфайли», — дея нашр Украина президенти гапларини келтириб ўтди.

Охир-оқибат, деб ёзади WP, Зеленский АҚШ ва Европа мамлакатлари ҳукуматлари вакилларини Украинани қўллаб-қувватлаш зарурлигига ишонтира олди. Хусусан, у Германия канцлери Олаф Шольцни «бу деворни қулатиш»га (1987 йилда Берлин деворини олиб ташлашга чақирган АҚШ президенти Рональд Рейганнинг иборасига ишора) ва Россия «Европани парчалаб юбориши»га йўл қўймасликка чақирди. Германиялик сиёсатчилар билан суҳбатда Зеленский «бу урушдан кейин уялиб қолмаслик учун» қўлдан келган ҳамма нарсани қилиш кераклигида туриб олган, дейилади мақолада.

Жанговар ҳаракатлар бошланганидан кейин Ғарб мамлакатлари украиналик ҳарбийларга ўлим қуроллари ва бошқа мудофаа маҳсулотларини етказиб бериш ҳажмини оширди. Июнь охирида АҚШ президенти Жо Байден айтганидек, 50 дан ортиқ давлат Киевга ҳарбий кўмак бериш мажбуриятини олган.