AQSH 24-avgust, chorshanba kuni Ukrainaga qariyb 3 milliard dollarlik navbatdagi harbiy yordam paketi haqida e’lon qiladi. Bu haqda Reuters AQSH hukumatidagi manbasiga tayanib xabar berdi, deb yozadi “RBK”.
Yangi paket Ukrainadagi harbiy harakatlar boshidan buyon Vashington taqdim etgan harbiy yordamlar ichida eng yirigi bo‘ladi, deb ta’kidladi agentlik. Bungacha ko‘makning maksimal miqdori 1 milliard dollarni tashkil qilgan.
Harbiy yordam paketi Ukraina Mustaqillik kuniga (24-avgust) tayyorlanmoqda.
Amerikalik mansabdorlar AP’ga ma’lum qilishicha, mablag‘lar dronlar va boshqa qurol-yarog‘lar bo‘yicha shartnomalarni moliyalashtirishga sarflanadi, ular Kiyevga o‘rta va uzoq muddatli istiqbolda mudofaani mustahkamlash imkonini beradi. Bundan avval yetkazilgan qurollar Ukrainaning shoshilinch harbiy ehtiyojlarini qoniqtirishga yo‘naltirilgan bo‘lib, Pentagon omborlarida saqlanayotgan va eng qisqa muddatlarda yuborilishi mumkin bo‘lgan qurol-yarog‘larni o‘z ichiga olgan edi, deb yozadi agentlik.
So‘nggi marta 19-avgust kuni AQSH Ukrainaga 775 million dollarlik navbatdagi yordam paketini ajratgandi. U HIMARS baravar o‘t ochish reaktiv tizimi uchun o‘q-dorilar, 16 ta gaubitsa, mingta Javelin tankka qarshi raketalari, razvedka uchun 15 ta ScanEagle dronlari, 40 ta zirhli mashina, HARM radiolokatsiyaga qarshi raketalar, 1,5 mingta TOW tankka qarshi raketa majmualari, minadan tozalash vositalari va Hummer harbiy avtomobillarini o‘z ichiga oldi.
Keyinroq Politico nashri AQSH harbiy yordam doirasida Ukrainaga ba’zi turdagi qurol-yarog‘lar yetkazib berilayotgani haqida ma’lum qilmayotgan bo‘lishi mumkinligi haqida yozdi.
Izoh (0)