AQSH Ukrainaga yana 800 mln dollarlik harbiy yordam ajratishni rejalashtirmoqda — Reuters
AQSH 19-avgust kuni Ukrainaga 800 million dollarlik yangi harbiy yordam paketi berilishini e’lon qiladi, deb yozmoqda Reuters agentligi uch nafar manbaga tayanib.
Suhbatdoshlarga ko‘ra, prezident Jo Bayden davlat rahbarining AQSH zaxiralaridagi “ortiqcha qurollar”ni yuborish imkonini beruvchi vakolatlaridan foydalanadi. Qaysi turdagi qurollar haqida gap ketayotgani aytilmagan.
Bir hafta oldin, 8-avgust kuni AQSH rasmiylari Ukrainaga yordam berish uchun 1 milliard dollar ajratayotganini e’lon qilgandi. Yordam paketiga HIMARS baravar o‘t ochuvchi reaktiv tizimlar uchun raketalar, NASAMS zenit-raketa tizimlari uchun o‘q-dorilar, 50 ta M113 zirhli tibbiy transport vositalari, shuningdek, artilleriya o‘q-dorilari, mingta FGM-148 Javelin tankka qarshi portativ tizimlar, dori vositalari va portlovchi moddalar kiritilgan.
Fevral oyida Rossiya bosqini boshlanganidan beri AQSHning Ukrainaga bergan harbiy yordami umumiy miqdori 9,8 milliard dollarga yetdi.
Urush boshlanganidan keyin G‘arb davlatlari Kiyevga qurol yetkazib berishni kuchaytirgandi. Xususan, Ukraina Qo‘shma Shtatlardan 16 ta HIMARS tizimini (MLRS) olgan, Pentagon jami 20 dan ortiq bunday tizimlarni va’da qildi. Buyuk Britaniya ham Ukrainani MLRS bilan ta’minlamoqda. Mamlakatga yuborilgan boshqa qurollar qatorida Javelin va NLAW tankka qarshi tizimlari, Stinger zenit tizimlari, Starstreak havo hujumidan mudofaa tizimlari va boshqalar bor. Ukraina prezidenti Vladimir Zelenskiy qo‘shimcha ta’minot hisobiga urushda “burilish nuqtasi” uchun imkoniyat borligini aytgan.
