Zelenskiy Qrimni “har qanday vositalar yordamida” qaytarib olishga va’da berdi

Ukraina Qrimni “o‘zi to‘g‘ri deb bilgan har qanday vositalar yordamida” qaytarib oladi, dedi Vladimir Zelenskiy “Qrim platformasi” onlayn-sammiti chog‘ida.

“Qrimni ozod qilish zarur. Bu dunyo huquqiy tartibining qayta tiklanishi bo‘ladi. Biz boshqa mamlakatlar bilan maslahatlashmagan holda, Qrimni o‘zimiz to‘g‘ri deb bilgan har qanday vositalar yordamida qaytarib olamiz”, — dedi Zelenskiy.

Bosh vazir Denis Shmigal ham sammitda nutq so‘zlar ekan, Kiyev Qrimda “qurolsizlantirish o‘tkazish”ga tayyorligini ma’lum qildi. Uning aniqlik kiritishicha, yarim orol hududida turib, Ukraina hududi o‘qqa tutilmoqda, bu esa u yerdagi Rossiya harbiy infratuzilmasini “qonuniy jangovar nishon”ga aylantirmoqda.

“Shuning uchun Ukraina Qrimni qurolsizlantirishga va bizning davlatimizga nisbatan ham, butun Yevropaga nisbatan ham bu xavflarni barataraf etishga tayyor. Ayni vaqtda biz Rossiyaning o‘z ixtiyori bilan Qrim hududidan o‘z qo‘shinlari va harbiy texnikasini olib ketishini olqishlagan bo‘lardik”, — deya qo‘shib qo‘ydi bosh vazir.

Avvalroq Turkiya prezidenti Rajab Toyyib Erdo‘g‘on Kiyevdagi “Qrim platformasi” onlayn-sammiti ishtirokchilariga yo‘naltirilgan videomurojaatida Qrim yarim oroli Ukrainaga qaytarilishi zarurligini ma’lum qilgani xabar berilgandi. “Xalqaro huquqqa muvofiq, Qrim Ukrainaga qaytarilishi kerak, u Ukrainaning ajralmas qismidir”, — dedi Turkiya rahbari.

Moskva 2014-yilgi referendumdan keyin Qrimning kimga tegishliligi masalasi muhokama qilinmasligini bir necha marta aytib o‘tgan. “Qrim xalqi qaror qabul qildi va ovoz berdi. Masala tarixiy jihatdan yopildi”, — degan edi Putin 2016-yilda. Rossiya tashqi ishlar vaziri o‘rinbosari Andrey Rudenko 2019-yilda Rossiya Qrimning tegishlilik masalasini hech qanaqa maydonda muhokama qilmasligini aytgandi.