“RIA Novosti” jurnalistlar Darya Duginani o‘ldirishda gumonlanuvchi Natalya Vovkning otasi deb atayotgan kishi bilan intervyuni e’lon qildi, deb yozadi Meduza. Agentlik uning ism-sharifini oshkor qilmadi, videoda uning yuzi yopib qo‘yilgan. Intervyu qayerda va qachon olingani noma’lum.
Intervyuda u odam, xususan, Vovk Ukraina Quroli kuchlarida “xizmat qilgandi, shekilli”, dedi, shuningdek, ukrainalik qochqin sifatida yaqinda Yevropada ham bo‘lgan. “U yerga bolasi bilan borgandi. U Fransiyaga qochqin sifatida ketgandi. Unga yoqmadi va Polshaga qaytdi, keyin esa Ukrainaga qaytib keldi”, — dedi u.
Uning so‘zlariga ko‘ra, so‘nggi marta Natalya Vovk unga uch-to‘rt kun avval qo‘ng‘iroq qilgan. “‘Ishlaring qalay?’ dedim. U ‘Hammasi joyida, hammasi yaxshi’ dedi. U internet orqali, skaypmi, nimadir orqali men bilan bog‘landi. Litvadaman, degandi, shekilli”, — deya gapirib berdi erkak.
Shuningdek, u Vovk “Azov” polkida xizmat qilganini rad etdi va u Donbassdagi aksilterrorchilik operatsiyasida qatnashmaganini aytdi.
“U ‘Azov’da xizmat qilmagan, Ukraina Qurolli kuchlarida xizmat qilgan shekilli. Keyin u hisob-kitob qilib, ketdi. Uni operatsiya qilishdi, boshida qanaqadir o‘simta bor edi”, — dedi erkak. Muxbirning Natalya Vovk qurol va portlovchi qurilmalar bilan ishlashni o‘rganganmi, degan savoliga javoban shunday dedi: “Ularni poligonga olib borishganini aytgandi. Ular u yerda o‘q otishni mashq qilganmi, yo‘qmi — bilmayman”.
Darya Dugina — faylasuf Aleksandr Duginning qizi — 20-avgust kuni Podmoskovyeda avtomobili portlab ketishi oqibatida halok bo‘ldi. Rossiya Federal xavfsizlik xizmati uning o‘ldirib ketilishini Ukraina maxsus xizmatlari uyushtirganini, qotillik ijrochisi esa Ukraina fuqarosi Natalya Vovk bo‘lganini ma’lum qildi. U 12 yoshli qizi bilan Rossiyaga kelib, Dugina yashaydigan uyda xonadon ijaraga olgan va uni kuzatgan, uning avtomobili masofadan turib portlatilganidan keyin esa Estoniyaga jo‘nab ketgan. Kiyev Duginaning o‘ldirilishiga aloqadorligini rad etmoqda.
Izoh (0)