Ukraina Qurolli kuchlari bosh qo‘mondoni Valeriy Zalujniy Rossiya hujumi boshlanganidan buyon qariyb to‘qqiz ming nafar ukrainalik harbiy xizmatchilar halok bo‘lganini ma’lum qildi, deb yozadi Meduza. Bunday ma’lumotlarni u “Himoyachilar. Yo‘qlama” forumida keltirib o‘tdi.
Zalujniy o‘z nutqi chog‘ida Ukrainadagi bolalar himoyaga muhtoj ekani, “chunki ularning otalari frontga ketib, endi, ehtimol halok bo‘lgan qariyb to‘qqiz ming nafar qahramonlar safiga kirgani”ni aytdi.
So‘nggi marta Ukraina hukumati o‘z jangovar talafotlari haqida iyul boshida ma’lum qilgandi. O‘shanda Ukraina prezidenti ofisi rahbarining masalahatchisi Aleksey Arestovich uning hisob-kitoblari bo‘yicha urush boshidan buyon 10 ming nafargacha ukrain harbiylari halok bo‘lganini aytgandi. Aprelda esa Ukraina prezidenti Vladimir Zelenskiy urush davomida 2500 dan 3000 gacha Ukraina harbiylari halok bo‘lganini ma’lum qilgandi.
Avvalroq BMT 24-fevraldan 24-iyulgacha o‘tgan besh oy ichida Ukrainada 5237 nafar tinch aholi halok bo‘lganini ma’lum qilgandi.
BBC nashri 24-iyunga qadar ochiq manbalardan Ukrainadagi urushda 4010 nafar rossiyalik askar halok bo‘lgani haqidagi ma’lumotlarni topishga muvaffaq bo‘lgandi.
Izoh (0)