«РИА Новости» журналистлар Даря Дугинани ўлдиришда гумонланувчи Наталя Вовкнинг отаси деб атаётган киши билан интервьюни эълон қилди, деб ёзади Meduza. Агентлик унинг исм-шарифини ошкор қилмади, видеода унинг юзи ёпиб қўйилган. Интервью қаерда ва қачон олингани номаълум.
Интервьюда у одам, хусусан, Вовк Украина Қуроли кучларида «хизмат қилганди, шекилли», деди, шунингдек, украиналик қочқин сифатида яқинда Европада ҳам бўлган. «У ерга боласи билан борганди. У Францияга қочқин сифатида кетганди. Унга ёқмади ва Польшага қайтди, кейин эса Украинага қайтиб келди», — деди у.
Унинг сўзларига кўра, сўнгги марта Наталя Вовк унга уч-тўрт кун аввал қўнғироқ қилган. «‘Ишларинг қалай?’ дедим. У ‘Ҳаммаси жойида, ҳаммаси яхши’ деди. У интернет орқали, скайпми, нимадир орқали мен билан боғланди. Литвадаман, деганди, шекилли», — дея гапириб берди эркак.
Шунингдек, у Вовк «Азов» полкида хизмат қилганини рад этди ва у Донбассдаги аксилтеррорчилик операциясида қатнашмаганини айтди.
«У ‘Азовъда хизмат қилмаган, Украина Қуролли кучларида хизмат қилган шекилли. Кейин у ҳисоб-китоб қилиб, кетди. Уни операция қилишди, бошида қанақадир ўсимта бор эди», — деди эркак. Мухбирнинг Наталя Вовк қурол ва портловчи қурилмалар билан ишлашни ўрганганми, деган саволига жавобан шундай деди: «Уларни полигонга олиб боришганини айтганди. Улар у ерда ўқ отишни машқ қилганми, йўқми — билмайман».
Даря Дугина — файласуф Александр Дугиннинг қизи — 20 август куни Подмосковеда автомобили портлаб кетиши оқибатида ҳалок бўлди. Россия Федерал хавфсизлик хизмати унинг ўлдириб кетилишини Украина махсус хизматлари уюштирганини, қотиллик ижрочиси эса Украина фуқароси Наталя Вовк бўлганини маълум қилди. У 12 ёшли қизи билан Россияга келиб, Дугина яшайдиган уйда хонадон ижарага олган ва уни кузатган, унинг автомобили масофадан туриб портлатилганидан кейин эса Эстонияга жўнаб кетган. Киев Дугинанинг ўлдирилишига алоқадорлигини рад этмоқда.
Изоҳ (0)