Niderlandiya Ukrainaga yordam berish uchun 80 million yevro miqdorida qo‘shimcha moliyaviy yordam paketini ajratdi. Bu haqda mamlakat hukumati saytida xabar qilingan.
Qo‘shimcha yordam ajratish to‘g‘risidagi qaror Niderlandiya mudofaa vaziri Kaysa Ollongren hamda tashqi savdo va hamkorlik vaziri Lishe Shraynemaxerning Kiyev va Irpinga tashrifidan so‘ng qabul qilingan.
Ajratilgan pulning katta qismi Ukraina infratuzilmasini tiklashga yo‘naltiriladi. Taxminan 65 million yevroni harbiy harakatlar paytida vayron bo‘lgan ko‘priklar, to‘g‘onlar, kasalxonalar va boshqa infratuzilmalarni rekonstruksiya qilish bilan shug‘ullanuvchi Niderlandiya kompaniyalari oladi. Yana 10 million yevro esa portlovchi qurilmalarni zararsizlantirishga yo‘naltiriladi.
Yana 2,5 million yevroni esa Niderlandiya Ukraina bilan iqtisodiy islohotlar bo‘yicha hamkorlik qilish uchun Yevropa tiklanish va taraqqiyot bankiga (YTTB) yuboradi. Amsterdam mojaro paytida jinsiy va gender asosidagi zo‘ravonlik qurbonlarini qo‘llab-quvvatlash uchun 2 million yevro ajratdi. Shuningdek, 1 million yevro Xerson, Odessa va Nikolayevni rekonstruksiya qilish rejalariga yordam beradi.
Umuman olganda, Rossiyaning Ukrainadagi bosqini boshlanganidan beri Niderlandiya Kiyevga 210 million yevroga yaqin mablag‘ ajratdi. Shuningdek, mamlakat Ukraina Qurolli kuchlarini qurol-yarog‘ va kiyim-kechak bilan ta’minlagan.
Iyul oyi o‘rtalarida Niderlandiya bosh vaziri Mark Ryutte Kiyevga tashrif buyurib, Ukraina prezidenti Vladimir Zelenskiy bilan uchrashgan edi. Zelenskiy aytganidek, tomonlar Ukrainaga artilleriya tizimlari va boshqa qurollarni yetkazib berish masalasini muhokama qilgan. Ryuttening o‘zi NATO davlatlarini Kiyevga yordam berishga chaqirgan.
Izoh (0)