AQSH Ukrainaga bir qator qurollarni maxfiy ravishda yetkazayotgan bo‘lishi mumkin — Politico

AQSH harbiy yordam doirasida Ukrainaga ba’zi turdagi qurol-yarog‘lar yetkazib berilayotgani haqida ma’lum qilmayotgan bo‘lishi mumkin, deb yozadi Politico.

Nashr ma’lumotlariga ko‘ra, Pentagonning yuqori mansabli amaldori 19-avgust kuni e’tirof etishicha, AQSH bir qancha vaqt mobaynida Kiyevga HARM radiolokatsiyaga qarshi raketalarni yetkazib bergan, ammo bu haqda ommaga e’lon qilinmagan.

“Biz HARM raketalari yetkazib berilishi haqida birinchi marta e’lon qilganimizda, ular bayonotda aniq qilib tilga olinmadi. Biz buni radiolokatsiyaga qarshi imkoniyatlar taqdim etayapmiz, deb ta’rifladik”, — dedi mansabdor.

Shundan keyin Yahoo News Vashington Kiyevga ATACMS oilasiga tegishli boshqariluvchi tezkor-taktik ballistik raketalarni taqdim etganini taxmin qildi.

Gazetaga manbalari ma’lum qilishicha, 19-avgust kuni e’lon qilingan yangi harbiy yordam paketiga Excalibur boshqariluvchi artilleriya snaryadlari kirgan, ular ham Pentagonning Ukrainaga taqdim etiladigan qurol-yarog‘lar haqidagi rasmiy bayonotida bo‘lmagan.

Bundan tashqari, Politico Kiyevga navbatdagi yordam paketi ajratilishi munosabati bilan AQSH ma’muriyati tomonidan Kongressga taqdim etilgan rasmiy bildirishnoma bilan tanishib chiqqan, unda Vashington tomonidan Ukrainaga yetkazib berilayotgan narsalar ro‘yxatda ko‘rsatilganlar bilan “cheklanmasligi” haqida yozilgan.

Nashr ta’kidlashicha, bu faqat taxmindir, chunki ma’muriyat a’zolarining hech biri Ukrainaga maxfiy ravishda qurol yetkazilayotganini tasdiqlamagan va hatto ishora ham qilmagan.

“Agar bunday ishlar amalga oshirilganida ham, AQSH hukumati bizga bu maxfiy qaror haqida xabar berishi ehtimoli kam”, — deya xulosa qildi Politico.

Eslatib o‘tamiz, 19-avgust kuni AQSH Ukrainaga 775 million dollarlik navbatdagi yordam paketini ajratdi. U HIMARS baravar o‘t ochish reaktiv tizimi uchun o‘q-dorilar, 16 ta gaubitsa, mingta Javelin tankka qarshi raketalari, razvedka uchun 15 ta ScanEagle dronlari, 40 ta zirhli mashina, HARM radiolokatsiyaga qarshi raketalar, 1,5 mingta TOW tankka qarshi raketa majmualari, minadan tozalash vositalari va Hummer harbiy avtomobillarini o‘z ichiga oldi.