Amerika razvedkasi Rossiya Ukrainaning davlat obyektlariga zarbalar berishga tayyorlanayotgani haqida ogohlantirdi

AQSHda Rossiya yaqin vaqt ichida Ukraina fuqarolik infratuzilmasiga va davlat obyektlariga yangi zarbalar berishni rejalashtirayotgani haqida razvedka ma’lumotlari bor. Bu haqda Reuters va The New York Times amerikalik mansabdorlar bayonotlariga tayanib xabar bermoqda.

AQSH hukumatida qayd etishlaricha, rasmiy shaxslarning xavf borasidagi xavotirlarini maksimal darajada keng auditoriyaga yetkazish uchun razvedkaning ushbu ogohlantirishi oshkor etilmoqda. Davlat departamenti yana bir marta AQSH fuqarolarini otishmalar xavfi tufayli Ukraina hududini tark etishga chaqirdi.

Ukraina Mudofaa vazirligi Razvedka bosh boshqarmasi ham ukrainaliklarni ogohlantirib chiqish qildi. Fuqarolar Ukraina Mustaqilligi kunida ayniqsa ehtiyot bo‘lishga da’vat etildi.

“Mamlakat ichida ham, tashqarisida ham raketa zarbalari va boshqa provokatsiyalar ehtimoli katta. Rossiya va Putin rejimi Ukraina mustaqilligiga hujum qildi. Ular haqiqatan ham sanalar va ramzlar shaydosi, shuning uchun Mustaqillik kuni ham hujumga uchrashiga oldindan tayyor turish ham mantiqiy bo‘ladi”, — dedi Razvedka bosh boshqarmasi vakili Andrey Yusov milliy telemarafon efirida.

23-avgust kuni Ukrainada Milliy bayroq kuni, 24-avgustda esa Mustaqillik kuni nishonlanadi. Xalqqa qilgan so‘nggi murojaatlaridan birida Ukraina prezidenti Vladimir Zelenskiy shu kunlari “Rossiya g‘oyatda jirkanch, g‘oyatda shafqatsiz biron narsa amalga oshirishga urinishi mumkinligi” haqida ogohlantirgandi.

Kiyevda bir hafta davomida ommaviy tadbirlar o‘tkazish taqiqlandi. Kiyevning hukumat dahasida joylashgan muassasalar xodimlariga 22-avgustdan 26-avgustgacha uydan ishlash tavsiya etildi. Shahar politsiyasi kiyevliklardan 23—25-avgust kunlari havo trevogasi signallarini e’tiborsiz qoldirmaslikni so‘radi.