Украина Қуролли кучлари бош қўмондони Валерий Залужний Россия ҳужуми бошланганидан буён қарийб тўққиз минг нафар украиналик ҳарбий хизматчилар ҳалок бўлганини маълум қилди, деб ёзади Meduza. Бундай маълумотларни у «Ҳимоячилар. Йўқлама» форумида келтириб ўтди.
Залужний ўз нутқи чоғида Украинадаги болалар ҳимояга муҳтож экани, «чунки уларнинг оталари фронтга кетиб, энди, эҳтимол ҳалок бўлган қарийб тўққиз минг нафар қаҳрамонлар сафига киргани»ни айтди.
Сўнгги марта Украина ҳукумати ўз жанговар талафотлари ҳақида июль бошида маълум қилганди. Ўшанда Украина президенти офиси раҳбарининг масалаҳатчиси Алексей Арестович унинг ҳисоб-китоблари бўйича уруш бошидан буён 10 минг нафаргача украин ҳарбийлари ҳалок бўлганини айтганди. Апрелда эса Украина президенти Владимир Зеленский уруш давомида 2500 дан 3000 гача Украина ҳарбийлари ҳалок бўлганини маълум қилганди.
Аввалроқ БМТ 24 февралдан 24 июлгача ўтган беш ой ичида Украинада 5237 нафар тинч аҳоли ҳалок бўлганини маълум қилганди.
BBC нашри 24 июнга қадар очиқ манбалардан Украинадаги урушда 4010 нафар россиялик аскар ҳалок бўлгани ҳақидаги маълумотларни топишга муваффақ бўлганди.
Изоҳ (0)