“Daryo” nashri yakunlanayotgan haftada hududlarda ro‘y bergan eng shov-shuvli voqealar ketma-ketligini esga oladi.
Yakunlanayotgan hafta Qashqadaryoda ikki qishloq o‘rtasida topolon bo‘lgani aytilgan xabar bilan boshlangandi. Mazkur voqeaga munosabat bildirgan Dehqonobod tumani hokimligi to‘polon ikki qishloq aholisi o‘rtasida emas, ikki korxona ishchilari o‘rtasida sodir bo‘lganini ma’lum qildi. Janjalga esa, kovrak shirasini yig‘ib olishga berilgan ruxsatnomadagi anglashilmovchilik sabab bo‘lgani xabar berildi. Shuningdek, mazkur ish yuzasidan tuman IIB tergov bo‘limi tomonidan jinoyat ishi qo‘zg‘atilgani bildirildi.
Dehqonoboddagi to‘polon shov-shuvi jamoatchilik yodidan ko‘tarilib ulgurmay, Ko‘kdaladagi futbol o‘yini paytida sodir bo‘lgan janjal videosi tarqaldi. Mazkur videolarni izohlagan Ko‘kdala tumani hokimligi voqea jamoatchilikka ikkita video orqali talqin qilinayotganini, ikki videodagi voqealarning biri Ko‘kdala tumanida sodir bo‘lgan bo‘lsa, yana biri Qamashi tumanidagi DXX raisi kubogi paytida ro‘y berganini ma’lum qildi.
Hokimlikning mazkur axborotiga e’tiroz bildirgan Qamashi tumani hokimligi to‘polon tumandagi DXX raisi kubogi paytida sodir bo‘lganini inkor etdi va Ko‘kdala tumani hokimligi axborot xizmatini ayrim manbalar deb nomladi. Shuningdek, ayrim manbalar bu haqda yolg‘on axborot tarqatmoqda dedi.
Shov-shuvli voqealari bilan jamoatchilikni zeriktirmaydigan Qashqadaryo viloyati hafta o‘rtasida Qarshi shahrida ro‘y bergan yana bir voqea sabab respublika aholisi e’tiborini hududga qaratdi. Qarshi shahrida teri zavodi faoliyatidan norozi bo‘lgan erkak ustiga benzin sepib, o‘zini yoqib yubordi.
Holatga e’tibor qaratgan Bosh prokuratura vaziyat o‘rganilayotganini, tergovga qadar tekshirish harakatlari boshlanganini bildirdi.
Hafta o‘rtasida viloyatda yana bir ayanchli voqea — Spark va Gentra to‘qnashishi oqibatida 8 kishining tiriklayin yonib ketish voqeasi ro‘y berdi.
Yakunlanayotgan hafta Namangan viloyatida ham juda ayanchli voqealar sodir bo‘ldi.
15-avgust kuni Norin tumanida er-xotin tarvuzdan zaharlanib vafot etgani aytilgan xabarlar tarqaldi. Ko‘p o‘tmay voqeani Bosh prokuratura tasdiqladi.
“Daryo” muxbiri surishtiruvi davomida oilaning yana to‘rt nafar vakili zaharlanish ortidan shifoxonaga yotqizilgani, ayni kunda ularning ahvoli yaxshi ekani ma’lum bo‘ldi.
Viloyatda shuningdek, Qur’oni Karimning noyob qo‘lyozmasi o‘g‘irlandi. Ko‘p o‘tmay, noyob nusxa topilib, o‘g‘rilar qo‘lga olindi.
Yakunlanayotgan hafta Qoraqalpog‘iston hayotida ham ko‘plab voqealar sodir bo‘lganini eslatib turadi.
Nukus voqealarini o‘rganuvchi mazsus komissiya yana ishini davom ettirib, navbatdagi yig‘ilishini o‘tkazdi. Oliy Majlis Qonunchilik palatasi spikeri o’rinbosari, “Milliy tiklanish” demokratik partiyasi markaziy kengashi raisi Alisher Qodirov Nukus voqealari haqida gapirib, mingdan ortiq namoyishchilar nega qo‘yib yuborilganiga aniqlik kiritdi.
Hududda, shuningdek, o‘z bolalariga zulm o‘tkazib, ularni xo‘rlab kelgan ayolga sud hukmi o‘qildi. Ayolga uch yil muddatga ozodlikdan cheklash javozi tayinlangan.
“Daryo” o‘quvchilariga yaxshi yangiliklarni ulashishda davom etadi.
Izoh (0)