«Дарё» нашри якунланаётган ҳафтада ҳудудларда рўй берган энг шов-шувли воқеалар кетма-кетлигини эсга олади.
Якунланаётган ҳафта Қашқадарёда икки қишлоқ ўртасида тополон бўлгани айтилган хабар билан бошланганди. Мазкур воқеага муносабат билдирган Деҳқонобод тумани ҳокимлиги тўполон икки қишлоқ аҳолиси ўртасида эмас, икки корхона ишчилари ўртасида содир бўлганини маълум қилди. Жанжалга эса, коврак ширасини йиғиб олишга берилган рухсатномадаги англашилмовчилик сабаб бўлгани хабар берилди. Шунингдек, мазкур иш юзасидан туман ИИБ тергов бўлими томонидан жиноят иши қўзғатилгани билдирилди.
Деҳқонободдаги тўполон шов-шуви жамоатчилик ёдидан кўтарилиб улгурмай, Кўкдаладаги футбол ўйини пайтида содир бўлган жанжал видеоси тарқалди. Мазкур видеоларни изоҳлаган Кўкдала тумани ҳокимлиги воқеа жамоатчиликка иккита видео орқали талқин қилинаётганини, икки видеодаги воқеаларнинг бири Кўкдала туманида содир бўлган бўлса, яна бири Қамаши туманидаги ДХХ раиси кубоги пайтида рўй берганини маълум қилди.
Ҳокимликнинг мазкур ахборотига эътироз билдирган Қамаши тумани ҳокимлиги тўполон тумандаги ДХХ раиси кубоги пайтида содир бўлганини инкор этди ва Кўкдала тумани ҳокимлиги ахборот хизматини айрим манбалар деб номлади. Шунингдек, айрим манбалар бу ҳақда ёлғон ахборот тарқатмоқда деди.
Шов-шувли воқеалари билан жамоатчиликни зериктирмайдиган Қашқадарё вилояти ҳафта ўртасида Қарши шаҳрида рўй берган яна бир воқеа сабаб республика аҳолиси эътиборини ҳудудга қаратди. Қарши шаҳрида тери заводи фаолиятидан норози бўлган эркак устига бензин сепиб, ўзини ёқиб юборди.
Ҳолатга эътибор қаратган Бош прокуратура вазият ўрганилаётганини, терговга қадар текшириш ҳаракатлари бошланганини билдирди.
Ҳафта ўртасида вилоятда яна бир аянчли воқеа — Spark ва Gentra тўқнашиши оқибатида 8 кишининг тириклайин ёниб кетиш воқеаси рўй берди.
Якунланаётган ҳафта Наманган вилоятида ҳам жуда аянчли воқеалар содир бўлди.
15 август куни Норин туманида эр-хотин тарвуздан заҳарланиб вафот этгани айтилган хабарлар тарқалди. Кўп ўтмай воқеани Бош прокуратура тасдиқлади.
«Дарё» мухбири суриштируви давомида оиланинг яна тўрт нафар вакили заҳарланиш ортидан шифохонага ётқизилгани, айни кунда уларнинг аҳволи яхши экани маълум бўлди.
Вилоятда шунингдек, Қуръони Каримнинг ноёб қўлёзмаси ўғирланди. Кўп ўтмай, ноёб нусха топилиб, ўғрилар қўлга олинди.
Якунланаётган ҳафта Қорақалпоғистон ҳаётида ҳам кўплаб воқеалар содир бўлганини эслатиб туради.
Нукус воқеаларини ўрганувчи мазсус комиссия яна ишини давом эттириб, навбатдаги йиғилишини ўтказди. Олий Мажлис Қонунчилик палатаси спикери ўринбосари, «Миллий тикланиш» демократик партияси марказий кенгаши раиси Алишер Қодиров Нукус воқеалари ҳақида гапириб, мингдан ортиқ намойишчилар нега қўйиб юборилганига аниқлик киритди.
Ҳудудда, шунингдек, ўз болаларига зулм ўтказиб, уларни хўрлаб келган аёлга суд ҳукми ўқилди. Аёлга уч йил муддатга озодликдан чеклаш жавози тайинланган.
«Дарё» ўқувчиларига яхши янгиликларни улашишда давом этади.
Изоҳ (0)