Oyiga 2 ming dollar topadigan talaba — IT Park’dan navbatdagi hikoya

IT Park yosh mutaxassis bo‘la turib ham yaxshigina daromad topish mumkinligini isbotlagan yoshlarning hikoyalarini chop etishda davom etmoqda.

Bu galgi qahramon — Mirislom Mirabzalov. U Toshkent shahrida tug‘ilib o‘sgan.

Mirislom maktabda informatika fanini yaxshi ko‘rardi. Shunda ham u o‘z hayotini IT bilan bog‘lamoqchi ekanligini angladi. 

Kompyuterga bo‘lgan mehr uni Toshkent axborot texnologiyalari kasb-hunar kollejiga, so‘ngra Toshkentdagi Amity University’ga olib keldi. U hozir ushbu dargohda 3-kursda o‘qiydi.

Iqtidorli talaba OTM’dagi o‘qishini o‘qituvchilik faoliyati bilan uyg‘unlashtirmoqda. Hozirda Mirislom Termiz shahridagi IT markazda Full stack yo‘nalishida dars beradi. 

Bundan tashqari “AD.Avzal.uz” loyihasi asosida Surxondaryo viloyatidagi IT Park rezidentlari qatoriga qo‘shilgan holda 17 ta loyiha ustida ishlamoqda.

Yosh mutaxassisning maqsadi — O‘zbekistonning IT-sohasini rivojlantirish va boshqa rivojlangan davlatlar qatori jahon axborot texnologiyalari markaziga aylantirishga ko‘maklashish.

Bundan tashqari, frilans yo‘nalishi Mirislom uchun katta ahamiyatga ega. U Sharqiy Yevropadagi mashhur “FL.ru” frilans-birjasining faol a’zosi va “Height” (@Height.company) deb nomlangan autsorsing buyurtmalarini bajaradigan o‘z kompaniyasini yaratishga muvaffaq bo‘ldi.

Mirislom Mirabzalovning oylik daromadi 2 ming dollarni tashkil qiladi.

Avvalroq IT Park 13 yoshida oyiga 500 dollar topadigan yigit haqida hikoya qilgan edi.