Ойига 2 минг доллар топадиган талаба — IT Park’дан навбатдаги ҳикоя

IT Park ёш мутахассис бўла туриб ҳам яхшигина даромад топиш мумкинлигини исботлаган ёшларнинг ҳикояларини чоп этишда давом этмоқда.

Бу галги қаҳрамон — Мирислом Мирабзалов. У Тошкент шаҳрида туғилиб ўсган.

Мирислом мактабда информатика фанини яхши кўрарди. Шунда ҳам у ўз ҳаётини IT билан боғламоқчи эканлигини англади. 

Компьютерга бўлган меҳр уни Тошкент ахборот технологиялари касб-ҳунар коллежига, сўнгра Тошкентдаги Amity University’га олиб келди. У ҳозир ушбу даргоҳда 3-курсда ўқийди.

Иқтидорли талаба ОТМъдаги ўқишини ўқитувчилик фаолияти билан уйғунлаштирмоқда. Ҳозирда Мирислом Термиз шаҳридаги IT марказда Full stack йўналишида дарс беради. 

Бундан ташқари «AD.Avzal.uz» лойиҳаси асосида Сурхондарё вилоятидаги IT Park резидентлари қаторига қўшилган ҳолда 17 та лойиҳа устида ишламоқда.

Ёш мутахассиснинг мақсади — Ўзбекистоннинг IT-соҳасини ривожлантириш ва бошқа ривожланган давлатлар қатори жаҳон ахборот технологиялари марказига айлантиришга кўмаклашиш.

Бундан ташқари, фриланс йўналиши Мирислом учун катта аҳамиятга эга. У Шарқий Европадаги машҳур «FL.ru» фриланс-биржасининг фаол аъзоси ва Height (@Height.cоmpany) деб номланган аутсорсинг буюртмаларини бажарадиган ўз компаниясини яратишга муваффақ бўлди.

Мирислом Мирабзаловнинг ойлик даромади 2 минг долларни ташкил қилади.

Аввалроқ IT Park 13 ёшида ойига 500 доллар топадиган йигит ҳақида ҳикоя қилган эди.