O‘zbekiston tarixida birinchi marta Navoiy kon-metallurgiya kombinati (NKMK) kompaniyasi tomonidan yetakchi xalqaro banklardan 5 yil muddatga garovsiz uzoq muddatli sindikatsiyalashgan kredit jalb etildi.
Bitimning umumiy qiymati 1,2 mlrd dollarni tashkil etadi. Mablag‘larni taqdim etishda JP Morgan&Chase, Citi, Societe Generale, Credit Suisse, ICBC Standard, Halyk Bank va Deutsche Bank kabi banklar ishtirok etmoqda.
Ushbu mablag‘lar kompaniyaning umumiy korporativ maqsadlari hamda investitsiya dasturini moliyalashtirish uchun yo‘naltiriladi.
NKMK kompaniyasi bitimda ishtirok etayotgan barcha hamkorlar — xalqaro banklarga samarali hamkorlik uchun minnatdorchilik bildirgan.
Bu NKMK uchun xalqaro moliya bozorlari bilan hamkorlikni rivojlantirish bo‘yicha birinchi qadam bo‘lib, kompaniyani kelajakda yevroobligatsiya joylashtirish va IPO’ga tayyorlaydi.
2019-yilda boshlangan NKMK kompaniyasining transformatsiyasi uning O‘zbekiston oltin qazib olish sanoatidagi mavqeyini mustahkamladi.
Avvalroq Navoiy kon-metallurgiya kombinati 2021-yilda 11,3 trln so‘m sof foyda olgani haqida xabar berilgan edi.
Izoh (0)