Farg‘ona viloyatida joylashgan “Qortuz” korxonasi Toshkent shahridagi “Orzu” savdo belgisi ostida chiqayotgan iste’mol tuzi dizaynini takrorlagani ma’lum bo‘ldi. Bu haqda “Hudud24.uz” xabar berdi.
Qadoqda “Qortuz” so‘zining “ortu” harflari qizil rang bilan ajratib yozilgani, “T” harfi “Z” shakliga o‘xshatib tasvirlangani, “U” harfining o‘ng tarafida shu’lalar tasviri, yozilish uslubi, shrift turi, joylashgan joyi va hoshiyada yulduz shaklining mavjudligi, foni va boshqalarga asosan “Orzu osh tuzi”ga iste’molchilarni adashtirib yuborish darajasida o‘xshashligi aniqlandi.
Shunga ko‘ra, kompaniyaga nisbatan Ma’muriy javobgarlik to‘g‘risidagi kodeksning 177-moddasi bilan ma’muriy huquqbuzarlik to‘g‘risidagi bayonnoma rasmiylashtirilib, jinoyat ishlari bo‘yicha tuman sudiga yuborildi.
Sud Farg‘ona viloyatida joylashgan kompaniyani huquqbuzarlik sodir etgan deb topib, ma’muriy jarima jazosi tayinladi.
Avvalroq O‘zbekistonda raqobat qonunini buzgan kompaniyalar ro‘yxati yangilangani haqida xabar berilgandi.
Izoh (0)