O‘zbekiston dunyoning yirik un importchilaridan biri hisoblanib, bu yil odatdagidan kamroq un sotib olishi kutilmoqda. Bu haqda World Grain xabar berdi.
Xalqaro Don kengashi (IGC) bu yilgi global un savdosi 14,3 mln tonna bo‘lishini prognoz qildi.
Bu 2021—2022-yillarda sotilgan 14,2 mln tonnadan biroz ko‘p va 2019—2020-yildan beri eng yuqori ko‘rsatkich bo‘ladi — 14,7 million tonna.
Dunyoning yirik un importchilaridan biri bo‘lgan O‘zbekiston odatdagidan ko‘p mahalliy bug‘doy hosili tufayli bir yil oldingiga qaraganda 50 ming tonnaga kamroq un import qilishi kutilmoqda.
Yana bir yirik import qiluvchi Braziliya 2021—2022-yilgi mavsumdagiga qaraganda 30 ming tonna kamroq un sotib olishi taxmin qilinmoqda.
Shu bilan birga, so‘nggi yillarda dunyodagi eng yirik un importchisi Iroq 2022—2023-yillarda 2,7 mln tonna un import qilishi prognoz qilinmoqda.
Bu avvalgi IGC choraklik prognozidan 100 ming tonnaga va bir yil avvalgidan 500 ming tonnaga ko‘p.
Yevropa Ittifoqi 2022—2023-yillarda 260 ming tonna un import qilishi kutilmoqda, bu IGC’ning aprel oyidagi prognozidan 110 ming tonnaga ko‘p.
Urushdan vayron bo‘lgan Afg‘oniston tomonidan import bo‘yicha prognoz biroz pasayib, 1,8 mln tonnadan 1,6 mln tonnaga tushdi, bu 2021—2022-yildagi umumiy ko‘rsatkichga teng.
IGC ma’lumotlariga ko‘ra, dunyodagi eng yirik un eksportchisi Turkiya 2022—2023-yillarda 5 mln tonnadan sal ko‘proq un eksport qilishga tayyor, bu 2018—2019-yilgi mavsumdan beri eng yuqori ko‘rsatkich bo‘ladi.
Qozog‘istonda un eksporti biroz pasayib, bu yil 2,2 mln tonna bo‘lishi kutilmoqda, bu 2021—2022-yillarga nisbatan 50 ming tonnaga kam.
Avvalroq O‘zbekiston besh oyda 49 mln dollarlik un import qilgani haqida xabar berilgandi.
Izoh (0)