Ukraina Qora dengizdagi portlaridan bir necha minalarni olib tashlashga rozi bo‘ldi. Bu haqda The New York Times (NYT) manbalariga tayanib xabar bermoqda.
Kiyev Ukraina g‘allasini eksport qilish bo‘yicha kelishuv doirasida bu qadamni qo‘yishga tayyor. Kelishuvni tuzish imkoniyati bugun, 22-iyul kuni Turkiyada muhokama qilinadi.
NYT ism-sharifi oshkor etilmagan uch amaldorga tayanib bu ma’lumotlarni taqdim qilgan. Ularga ko‘ra, g‘alla eksporti bo‘yicha kelishuvni ishlab chiqishda ishtirok etayotgan BMT Bosh kotibi Antoniu Guterrish Ukrainaning portlarni minalardan qisman tozalashga roziligi haqida gapirgan.
Kelishuv doirasida Ukraina floti yoki qirg‘oq qo‘riqlash xizmati donli kemalarning xalqaro suvlarga o‘tishini ta’minlashi kutilmoqda.
Turkiya qurol-aslaha kemalarda tashiladimi yoki yo‘qligini tekshirishi kerak. NYT ma’lumotlariga ko‘ra, Ukrainada 20 million tonnadan ortiq don to‘sib qo‘yilgan.
13-iyul kuni Ukraina g‘allasini tashish masalasi bo‘yicha yig‘ilish bo‘lib o‘tdi, unda Turkiya, Rossiya, Ukraina mudofaa vazirliklari, shuningdek, BMT delegatsiyalari ishtirok etdi.
Kiyev eksport Odessa, Yujniy va Chernomorsk portlari orqali amalga oshirilishini aytdi.
Ukraina Tashqi ishlar vazirligi mamlakat xavfsizlik kafolatlari mavjud bo‘lgan taqdirdagina don bo‘yicha kelishuvni qo‘llab-quvvatlashga tayyorligini ta’kidladi.
Izoh (0)