Qirg‘iziston sobiq prezidenti Kurmanbek Bakiyev zarur bo‘lsa, o‘zining ishi bo‘yicha sud jarayonlarida onlayn rejimida qatnashib, tergovchilarning barcha savollariga javob berishga tayyorligini ma’lum qildi, deb yozadi Asia Plus.
“Men har qanday xalqaro sudda qatnashishga tayyorman. Meninf ism-sharifim tarix sahifalarida toza bo‘lib qolishi va xalqim oldida o‘zimni oqlash uchun hamma narsaga tayyorman. Bizdan keyin ham nevaralarim familiyamni faxr bilan olib yurishini xohlardim. Men haqiqatdan qochmaydigan odamman, chunki adolatga tashnaman. Men hatto o‘zimga nisbatan sud qarorlarini ko‘rganim ham yo‘q. Ammo mamlakat rahbariyati men qayerda yashashimni biladi. Hech kim mendan o‘zimga nisbatan ayblovlar haqida so‘ragani yo‘q”, — dedi u.
Uning so‘zlariga ko‘ra, Qirg‘iziston huquq-tartibot organlari bu borada London sudidan o‘rnak olsa bo‘lardi.
“Bugungi kunda ko‘plab mamlakatlar rahbarlari bir-biri bilan onlayn tarzda muloqot qilmoqda. Nima uchun Qirg‘izistonda xuddi Londondagidek sud jarayoni o‘tkazish mumkin emas ekan? Istasak, bo‘lishi mumkin-ku. Hech bo‘lmasa, juda minnatdor bo‘lardim”, — dedi Bakiyev.
Xususan, u gapirib berishicha, Londonda, masalan, Shon Deylining da’vosi bo‘yicha o‘g‘li Maksim Bakiyevga nisbatan sud jarayoni doirasida onlayn rejimida sudya tomonidan so‘roq qilingan.
Qirg‘iziston ikkinchi prezidentining besh yillik hukmronligi siyosiy qotilliklar, muxolifatning ta’qib etilishi, korrupsiya va urug‘-aymoqchilik boshqaruvi bilan yodda qoldi.
Bakiyevning hokimiyati 2010-yil 7-aprelda, aprel inqilobi yuz berganidan keyin quladi. Xavfsizlik kuchlari bilan to‘qnashuvlarda 87 nafar fuqaro halok bo‘ldi. Bakiyevning o‘zi oilasi bilan Belarusga qochib ketdi va hozirgacha o‘sha yerda yashamoqda. Qirg‘izistonda unga va qarindoshlariga nisbatan jinoiy ishlar ochildi. Sobiq davlat rahbari sirtdan 30 yillik koloniyaga hukm qilingan.
Eslatib o‘tamiz, 2021-yil iyulida Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar mamlakatdagi eng yirik oltin koni bo‘lgan “Qumtor” ishi bo‘yicha xalqaro qidiruvga berilgan edi.
Izoh (0)