Ukraina prezidenti Vladimir Zelenskiy o‘z farmoni bilan Donetsk viloyatining Kiyev nazorati ostidagi 14 ta aholi punktida harbiy ma’muriyatlar tashkil qildi, deb yozadi “RBK” davlat rahbari saytiga tayanib. DXR butun viloyatni o‘zining hududi deb hisoblaydi, Rossiya DXRni viloyat chegaralari bilan tan olgan.
24-fevral kuni Rossiya harbiy operatsiyasi boshlanganidan keyin Zelenskiy mamlakatda harbiy holat rejimini e’lon qildi. U bir necha marta uzaytirildi. Oxirgi marta may oxirida Oliy rada uni 90 kunga, 23-avgustgacha uzaytirgandi. Mamlakatda, shuningdek, safarbarlik e’lon qilingan.
Xerson va Zaporojye viloyatlari Rossiya nazorati ostiga o‘tganidan keyin hududlarda harbiy ma’muriyatlar tuzildi. U yerlarda harbiy komendatura amal qiladi, shahar ma’muriyatlari binolariga Rossiya bayroqlari o‘rnatilmoqda, rubl muomalaga kiritilmoqda, Rossiya telekanallari translyatsiya qilinmoqda, Rossiyaga qo‘shilish haqida referendum o‘tkazilishi rejalashtirilmoqda.
4-iyul kuni Xerson harbiy-fuqarolik ma’muriyati rahbari Vladimir Saldo hudud hukumati raisi sifatida avval Kaliningrad viloyati hukumatida ishlagan Sergey Yeliseyevni tayinladi.
Rossiya DXR va LXRni mustaqil davlatlar sifatida 21-fevral kuni tan olgan edi. Ayni paytgacha Donbass respublikalari mustaqilligini Rossiyadan tashqari, Abxaziya ham tan olgan.
Respublikalarni tan olganidan keyin bir necha kun o‘tib, Rossiya Ukrainani “demilitarizatsiya va denatsifikatsiya qilish” (qurolsizlantirish va natsizmni yo‘q qilish) bo‘yicha harbiy operatsiya boshladi. Zelenskiy Rossiyaning respublikalar maqomi bo‘yicha qarorini tan olmadi va maxsus operatsiyaga javoban umumiy safarbarlik e’lon qilib, harbiy holat rejimini kiritdi. Shuningdek, Kiyev Moskva bilan diplomatik aloqalarni ham uzdi.
29-iyun kuni Suriya DXR va LXR mustaqilligini tan olish qarori haqida e’lon qildi. Suriya tomoni o‘zaro hamkorlikni mustahkamlash va diplomatik aloqalar o‘rnatish borasida ikkala respublika bilan bog‘lanishi qayd etildi. Shundan keyin Ukraina Suriya bilan aloqalarni uzdi.
Izoh (0)