Falastinlik guruh HAMAS, Misr va Qatar vositachilari taklif qilgan G‘azo bo‘yicha sulh hamda garovdagilarni ozod qilish rejasini qabul qildi. Bu haqda guruh manbaalariga tayanib, BBC xabar berdi.
Taklifga ko‘ra, HAMAS dastlabki 60 kunlik sulh davomida garovga olingan 50 nafar isroillikning taxminan yarmini (ulardan 20 nafari tirik deb taxmin qilinadi) ikki bosqichda ozod qiladi. Shuningdek, doimiy o‘t ochishni to‘xtatish bo‘yicha muzokaralar bo‘lib o‘tishi rejalashtirilgan.
Hozircha Isroilning munosabati noma’lum — bosh vazir Binyamin Netanyaxu o‘tgan hafta barcha garovdagilar bir vaqtning o‘zida ozod qilinmasa, kelishuvni qabul qilmasligini aytgandi. Shu bilan birga, Isroil qo‘shinlari G‘azo shahrida yangi harbiy operatsiyalarni davom ettirmoqda. Guvohlar Sabra mahallasida maktablar va BMT klinikalarini o‘rab olgan tanklar harakatini kuzatgan.
HAMAS delegatsiyasi bosh muzokarachisi Xalil al-Hayya Qohirada vositachilar bilan uchrashib, tinchlik taklifini ko‘rib chiqmoqda. Qatar bosh vaziri Shayx Muhammad bin Abdul Rahmon al Thani ham Misrga tashrif buyurib, tomonlarga kelishuvga erishish uchun bosim o‘tkazgan. Misr tashqi ishlar vaziri Badr Abdelatti Falastin hududidagi gumanitar vaziyatni “tasavvur qilib bo‘lmaydigan darajada” jiddiy deb ta’rifladi.
Isroil va HAMAS o‘rtasida urush boshidan beri G‘azoda kamida 62 004 kishi halok bo‘lgan. Aholining aksariyati bir necha marta ko‘chirilgan, 90 foizdan ortiq uylar vayron qilingan, sog‘liqni saqlash, suv va sanitariya tizimlari ishdan chiqqan. So‘nggi 24 soatda ocharchilik sabab 5 kishi, jumladan 2 nafar bola halok bo‘lgan, urush boshidan beri bunday o‘limlar soni 263 kishiga yetgan.
Ayni paytda, Tel-Avivda yuz minglab Isroil fuqarolari hukumatdan HAMAS bilan darhol kelishuvga erishib, barcha garovdagilarni ozod qilishni talab qilib, namoyish qilmoqda. Garovdagilarning oilalari esa yana bir hujum asirlar hayotini xavfga qo‘yishidan xavotirda. Isroil bosh vaziri urush faqat barcha garovdagilar ozod etilib, HAMAS qurolsizlantirilgandagina yakunlanishini aytgan. U G‘azoni demilitarizatsiya qilish, Isroil xavfsizligi nazorati ostida saqlash va HAMAS yoki Falastin hukumati bilan aloqasi bo‘lmagan ma’muriyat tomonidan boshqarilishini istaydi.
HAMAS esa garovdagilarni Falastin qamoqxonalaridagi mahbuslarga almashtirish, urushni to‘xtatish va Isroil qo‘shinlarini G‘azodan butunlay olib chiqishni talab qilmoqda. Guruh, mustaqil Falastin davlati tuzilmaguncha qurolsizlanmasligini ta’kidlamoqda.
Izoh (0)