AQSH harbiy harakatlar cho‘zilib ketsa ham, Ukrainaga qo‘shinlarini yubormaslikka va’da berdi

AQSH Rossiyaning Ukrainadagi harbiy operatsiyasi qanchalik uzoq davom etishini bilmaydi, deya ma’lum qildi Milliy xavfsizlik kengashining strategik kommunikatsiyalar bo‘yicha koordinatori Jon Kirbi. Uning aytishicha, AQSH ma’muriyati, hatto, jangovar harakatlar cho‘zilib ketgan taqdirda ham Ukrainaga o‘z qo‘shinlarini yubormoqchi emas.

Birifing chog‘ida Kirbidan Rossiyaning harbiy operatsiyasi qancha davom etishi mumkinligi haqida so‘rashdi. “Kimdir buni aniq biladi, deb o‘ylamayman… Kimdir buning muddatini oldindan ayta olaman, desa, bizni aldagan bo‘ladi”, — dedi u. Amerikalik mansabdor so‘zlariga ko‘ra, rossiyalik harbiylar “ko‘chama-ko‘cha” harakatlanmoqda, va ular katta progressga erishayotgani yo‘q.

Jangovar harakatlar cho‘zilib borgani sari, amerikalik harbiylarning “Rossiya bilan urushga aralashishi” ehtimoli bormi, degan savolga Jon Kirbi salbiy javob berdi. “Prezident Amerika qo‘shinlari Ukrainada jang qilmasligini aniq-ravshan aytgan. Biz faqat Ukrainaga o‘zini himoya qilishda yordam beramiz, xolos”, — deya aniqlik kiritdi u.

Avvalroq AQSH prezidenti Rossiyaga qarshi sanksiyalarning muqobil varianti Uchinchi jahon urushi bo‘lishini aytgandi. Davlat kotibi Entoni Blinken aprelda AQSH Rossiya bilan harbiy to‘qnashuvga yo‘l qo‘ymaslikdan manfaatdor ekanini ma’lum qilgan. Amerika ma’muriyati Ukrainaga Rossiya bilan to‘g‘ridan to‘g‘ri harbiy nizodan tashqari, har qanday yordamni taqdim etishga tayyorligini ta’kidlagan.

Eslatib o‘tamiz, 23-iyun, payshanba kuni Ukrainaga AQSH tomonidan taqdim etilgan HIMARS baravar o‘t ochish reaktiv tizimlari yetib keldi.

Shuningdek, AQSH Ukrainaga 450 million dollarlik qo‘shimcha harbiy yordam paketini ajratishini e’lon qildi. Yangi paketga baravar o‘t ochish raketa tizimlari, patrul katerlari, artilleriya o‘q-dorilari kiradi.