“Ukrainani demokratlashtirish va yangi hujumlardan himoya qilish”. Bayden AQSHning maqsadlarini sanadi

AQSH o‘zi yoki ittifoqchilari hujumga uchramaguncha Ukrainadagi mojaroga to‘g‘ridan to‘g‘ri kirishmoqchi emas. Bu haqda AQSH prezidenti Jo Bayden The New York Times gazetasiga yozgan maqolasida ta’kidlagan.

Bayden Ukrainadagi janglar to‘rt oydan beri davom etayotganiga e’tibor qaratdi va bunday sharoitda AQSHning maqsadlarini aniq belgilash zarur, deb ta’kidladi. “Amerikaning maqsadi oddiy: biz demokratlashgan, mustaqil, suveren va gullab-yashnagan Ukrainani ko‘rishni, uni keyingi tajovuzlardan himoya qilish vositalariga ega bo‘lishini istaymiz”, — dedi u.

Bayden AQSH nimalar qilishi va nimalar qilmasligini ham sanab o‘tdi. Uning so‘zlariga ko‘ra, Vashington quyidagilarni amalga oshiradi:

• Kiyevni “Ukrainadagi jang maydonlaridagi asosiy nishonlarga aniqroq zarbalar yo‘llash” imkonini beradigan zamonaviy raketa tizimlari va o‘q-dorilar bilan ta’minlash;
• zamonaviy qurol-yarog‘lar, jumladan, Javelin tankka qarshi raketalari, Stinger zenit raketalari, artilleriya va yuqori aniqlikdagi raketa tizimlari, radarlar, uchuvchisiz uchar apparatlar, Mi-17 vertolyotlarini yetkazib berishni davom ettirish;
• Kiyevga moliyaviy yordam ko‘rsatishni davom ettirish;
• ittifoqchilar va sheriklar bilan Rossiyaga qarshi sanksiyalar masalasida hamkorlik qilish;
• global oziq-ovqat inqirozini bartaraf etish bo‘yicha ish olib borish;
• Yevropa ittifoqchilari va boshqa mamlakatlarga Rossiyaning yoqilg‘isiga qaramligini kamaytirishga yordam berish;
• NATOning sharqiy qanotini mustahkamlash.

Shu bilan birga, Baydenning ta’kidlashicha, Rossiya va NATO o‘rtasida urush chiqishiga yo‘l qo‘ymaslik uchun Vashington quyidagilarni qilmaydi:

• Rossiyada rejimni o‘zgartirishga urinish;
• Ukrainada jang qilish yoki rus qo‘shinlariga hujum qilish uchun amerikalik askarlarni yuborish;
• Ukrainani o‘z chegaralaridan tashqariga zarba berishga undash;
• Ukrainaning Rossiyaga “har qanday hududiy yon berishi” uchun bosim o‘tkazish.

Baydenga ko‘ra, Rossiya va Ukraina o‘rtasidagi muzokaralar Moskva ta’kidlayotganidek, Kiyev muzokaralarni “sabotaj qilgani” uchun emas, balki Rossiya tomoni “Ukrainaning imkon qadar ko‘p qismini nazoratga olishga” qaror qilgani uchun to‘xtab qolgan. Uning so‘zlariga ko‘ra, Vashington Kiyevni “urushga muzokaralar yo‘li bilan barham berishga” urinishlarini qo‘llab-quvvatlaydi.

AQSH prezidenti o‘z maqolasida, dunyoda ko‘pchilik yadro qurolidan foydalanish ehtimolidan xavotirda ekanini ta’kidladi. Uning so‘zlariga ko‘ra, Vashington Rossiyaning yadrodan foydalanish niyatidan dalolat beruvchi belgilarni ko‘rmayapti.

Rossiyaning Ukrainaga bosqini boshlanganidan beri G‘arb davlatlari va NATO Kiyevga bir necha bor qurol-yarog‘ yetkazib bergan, biroq ayni paytda ular Moskvaning reaksiyasidan qo‘rqib, og‘ir texnikalarni jo‘natishdan tiyilmoqda.

31-may kuni AQSH prezidenti Jo Bayden Vashington Kiyevga Rossiya hududiga yetib bora oladigan raketa komplekslarini bermasligini aytgan edi. The New York Times’ga yozgan maqolasida u Kiyevga “jang maydonidagi asosiy nishonlarga aniqroq zarba yo‘llash” imkonini beradigan ilg‘or raketa tizimlari va o‘q-dorilar yetkazib berilishini e’lon qildi.