Birlashgan Millatlar Tashkilotining Bolalar jamg‘armasi (YUNISEF) o‘z hisobotida 5 yoshgacha bo‘lgan qariyb 8 million bolaning hayoti surunkali to‘yib ovqatlanmaslik sabab xavfi ostida ekanini ma’lum qildi.
Hisobotga ko‘ra, bu bolalarning aksariyati oziq-ovqat va tibbiy vositalar taqchilligidan qattiq qiynalayotgan 15 mamlakatda yashaydi. Inqirozdagi ushbu davlatlar orasida Afg‘oniston, Efiopiya, Gaiti va Yaman bor.
To‘yib ovqatlanmaslik immunitetning zaiflashishiga olib keladi, bu esa 5 yoshgacha bo‘lgan bolalar o‘rtasida o‘lim xavfini yaxshi ovqatlangan bolalarga nisbatan 11 baravar oshiradi. Hisobotda aytilishicha, 2022-yil boshidan buyon yana 260 ming bola to‘yib ovqatlanmaslikdan aziyat chekkan.
Ukrainadagi mojaro va dunyoning ayrim qismlarida davom etayotgan iqlim o‘zgarishi sabab qurg‘oqchilik tufayli oziq-ovqat narxi keskin ko‘tarildi. Hisobotda aytilishicha, COVID-19 ning davom etayotgan iqtisodiy ta’siri ham bolalarning to‘yib ovqatlanmasligiga olib kelmoqda.
YUNISEF yaqinlashib kelayotgan inqirozni bartaraf etish uchun zudlik bilan xalqaro hamjamiyatdan 1,2 milliard dollarlik yordam paketi zarurligini aytdi.
“Germaniyada G7 sammitiga yig‘ilgan dunyo yetakchilarida bu bolalar hayotini saqlab qolishga chora ko‘rish uchun kichik imkoniyat oynasi mavjud. Vaqtni yo‘qotmaslik kerak. Ochlik e’lon qilinishini kutish bolalarning o‘lishini kutishdir”, — dedi YUNISEF ijrochi direktori Ketrin Rassel.
Izoh (0)