Anqara va Tel-Aviv G‘azo sektoridagi voqealarga turlicha baho berganidan so‘ng, 2018-yildan beri elchilik aloqalarini tugatgan edi. O‘shanda Erdo‘g‘on Isroilni terrorchi davlat deb atagan, Netanyaxu esa Turkiya rahbarini HAMASni qo‘llab-quvvatlashda ayblagandi.
Anqara va Tel-Aviv ikki tomonlama munosabatlarning diplomatik darajasini o‘zaro elchilar tayinlash darajasigacha ko‘taradi, deya ma’lum qildi Turkiya tashqi ishlar vaziri Mevlut Chavusho‘g‘li isroillik hamkasbi Yair Lapid bilan uchrashuv yakunlari bo‘yicha o‘tkazilgan matbuot anjumanida, deya xabar bermoqda Anadolu agentligi.
“Biz diplomatik vakolatxonamizni elchixona darajasiga ko‘tarish bo‘yicha ishlarni boshladik”, deydi u. Isroil vaziri Lapid bu niyatni tasdiqladi, deya xabar beradi Haaretz nashri.
Chavusho‘g‘lining so‘zlariga ko‘ra, tomonlar munosabatlardagi “ijobiy muloqotning borishini tasdiqlagan”. Isroil va Turkiya diplomatik vakillik darajasini o‘zgartirishdan tashqari, yaqin kelajakda yana bir oliy darajadagi uchrashuv o‘tkazish, “siyosiy va mintaqaviy maslahatlashuvlar” o‘rnatish, aralash iqtisodiy komissiya tuzish masalasini ko‘rib chiqish, shuningdek, turizm va qishloq xo‘jaligi sohasida hamkorlikni kengaytirish niyatida — deya yozadi Hurriyet. Vazir xavfsizlik, xususan, terrorchilik tahdidlaridan himoya qilish sohasidagi hamkorlikka alohida e‘tibor qaratgan.
Lapid, Haaretz gazetasining xabariga ko‘ra, Turkiyada Eron hujumi tahdidi ostida qolgan Isroil fuqarolarining hayotini saqlab qolgan uchun Turkiyaga minnatdorchilik bildirgan. “Biz nafaqat begunoh isroillik sayyohlarning o‘ldirilishi haqida, balki Eron terrori tomonidan Turkiya suverenitetini ochiqdan ochiq buzayotgani haqida ham gaplashamiz”, degan Lapid.
The Times of Israel nashrining yozishicha, gap Eron razvedkasida ishlagan va Istanbulda isroillik sayyohlarni o‘ldirish yoki o‘g‘irlab ketishni rejalashtirgan sakkiz kishining Anqara tomonidan hibsga olingani haqida ketmoqda.
Izoh (0)