Rossiyaning Ryazan viloyatida Il-76 harbiy-transport samolyoti qulab tushdi, bortdagi to‘qqiz kishidan to‘rt nafari halok bo‘ldi, deb yozadi “Kommersant”.
Favqulodda vaziyatlar vazirligining hududiy boshqarmasi xabariga ko‘ra, yerda vayronagarchiliklar bo‘lmagan. Mudofaa vazirligi halokatga dvigateldagi nosozlik sabab bo‘lganini ma’lum qildi.
Mash Telegram-kanali ma’lumotlariga ko‘ra, Il-76 Orenburgdan Belgorodga uchayotgan bo‘lgan, Ryazanga esa yonilg‘i olish uchun qo‘ngan. SHOT Telegram-kanali xabar berishicha, samolyot uchib chiqqanidan keyin deyarli darhol Mixaylov shossesi yaqiniga qulab tushgan.
Samolyot qulagani haqidagi xabar 3:18 da kelib tushgan. Mudofaa vazirligiga ko‘ra, Il-76 dvigatelida nosozlik aniqlangani sababli, uni o‘quv-mashq parvozi chog‘ida qo‘ndirishga qaror qilishgan. Samolyot qisman vayron bo‘lgan.
Halokatdan keyin yong‘in boshlangan. “TASS” manbalariga ko‘ra, besh kishi kasalxonaga yotqizilgan. Bir kishi barqaror og‘ir ahvolda reanimatsiyaga joylashtirilgan.
Izoh (0)