Ukraina mudofaa vaziri Aleksey Reznikov 23-iyun, payshanba kuni Ukrainaga AQSH tomonidan taqdim etilgan HIMARS baravar o‘t ochish reaktiv tizimlari yetib kelganini ma’lum qildi, deb yozadi “Interfaks”.
“HIMARS Ukrainaga keldi”, — deb yozdi Reznikov Twitter’da.
Shuningdek, AQSH Ukrainaga 450 million dollarlik qo‘shimcha harbiy yordam paketini ajratishi ma’lum bo‘ldi. Bu haqda Oq uydagi brifingda Pentagon vakili Jon Kirbi ma’lum qildi.
Yangi paketga baravar o‘t ochish raketa tizimlari, patrul katerlari, artilleriya o‘q-dorilari kiradi.
Kirbi qayd etishicha, urush boshlanganidan beri Ukrainaga taqdim etilgan yordamning umumiy qiymati 6,1 milliard dollarni tashkil qilgan. Amerikaning joriy ma’muriyati hokimiyat tepasiga kelganidan buyon esa Ukrainaga jami 6,8 milliard dollar ajratilgan.
Aprel oyida AQSH Ikkinchi jahon urushi tugaganidan keyin birinchi marta lend-liz dasturini ishga tushirgan, u ijara yoki davomiy bo‘lib-bo‘lib to‘lash shartlari bilan Ukrainaga qurol-yarog‘ taqdim etish imkoniyatini beradi.
Iyun boshida AQSH prezidenti Jo Bayden Ukrainaga u bir necha haftalardan buyon so‘rab kelayotgan HIMARS baravar o‘t ochish reaktiv tizimlarini yetkazib berish to‘g‘risidagi farmonni imzoladi. AQSH Ukraina ulardan Rossiya hududiga zarbalar berishda foydalanmaslikka va’da berganini ma’lum qildi.
Avvalroq AQSH Xalqaro taraqqiyot agentligi (USAID) rahbari Samanta Pauer Ukraina hukumati harbiy mojarolar fonida oyiga o‘rtacha 5-6 milliard dollar sarflayotganini ma’lum qilgandi.
Mavzuga doir:
Izoh (0)