KXDR rahbari Kim Chen In mamlakat qurolli kuchlarini qaytadan tashkil etadi, deb yozadi KCNA.
Kim Chen In Koreya Mehnat partiyasining Markaziy harbiy komissiyasi yig‘ilishini o‘tkazdi. Unda KXDRning “mudofaa qobiliyatini mustahkamlash va rivojlantirish” muhokama qilindi. Xususan, “qurolli kuchlarni yanada kuchaytirish va mustahkamlash”, shuningdek, harbiy tashkilotlarni “shtat jihatidan qayta qurish” rejasi ma’qullangan.
KXDR armiyasi tuzilmasi aynan qanday o‘zgarishi noma’lum, ammo ta’kidlanishicha, “Markaziy harbiy qo‘mita raisi o‘rinbosarlari rahbarligi ostida” Koreya xalq armiyasi bosh shtabi “tegishli masalalarni ko‘rib chiqqan va muhokama qilgan”.
Bundan tashqari, qo‘mita majlisida Shimoliy Koreya yetakchisi Kim Chen In “frontdagi qo‘shinlarning harbiy harakatlar bo‘yicha qobiliyatlarini oshirish” uchun chora-tadbirlarni bayon qilgan.
“Bosh kotib hozirgi paytda olib borilayotgan kurash chog‘ida og‘ir sinovlarni qat‘iyat bilan yengib o‘tishimiz kerakligini aytib, buning uchun Koreya armiyasining mutlaq kuchi va harbiy-texnik qudratini doimiy saqlab turish va tinimsiz oshirish kerakligini ta’kidladi”, — deyiladi Koreya Markaziy telegraf agentligi xabarida.
Avvalroq ekspertlar KXDR ketma-ket yadro sinovlariga tayyorlanayotgan bo‘lishi mumkinligini ma’lum qilgandi. Yaqinda sun’iy yo‘ldoshdan olingan fotosuratlar Shimoliy Koreya yadro poligonidagi faollikni ko‘rsatdi, u qo‘shimcha yadro sinovlari o‘tkazilishidan dalolat berishi mumkin.
Izoh (0)