Toshkent shahrida 20-iyun kuni Turizm va madaniy meros vazirligi hamda Ozarbayjon Davlat turizm agentligi o‘rtasida 2022-yilga mo‘ljallangan turizm sohasida hamkorlik dasturi imzolandi. Bu haqda Turizm va madaniy meros agentligi xabar qildi.
Qayd etilishicha, hujjatni Ozarbayjon prezidenti Ilhom Aliyevning O‘zbekistonga davlat tashrifi doirasida O‘zbekiston bosh vaziri o‘rinbosari, turizm va madaniy meros vaziri Aziz Abduhakimov va Ozarbayjon Davlat turizm agentligi raisi Fuad Nagiyev imzolagan. Dasturga muvofiq, tomonlar quyidagi yo‘nalishlarda hamkorlik qiladi:
- Ozarbayjon va O‘zbekistonning yirik shaharlarida “O‘zbekistonga sayohat” va “Ozarbayjonga sayohat” targ‘ibot tadbirlarini o‘tkazish;
- ikki davlat hududida O‘zbekiston va Ozarbayjon sayyohlik kompaniyalari vakillari ishtirokida sayyohlik yarmarkalarini o‘tkazish;
- O‘zbekiston va Ozarbayjon telekanallarida ikki davlatning sayyohlik salohiyati to‘g‘risidagi reklama materiallarini joylashtirish uchun efir vaqti almashinuvi, shuningdek, O‘zbekiston va Ozarbayjonning mashhur telekanallari ko‘rsatuvlarini suratga olishni tashkil etish bilan bog‘liq masalalarni o‘rganish;
- O‘zbekistonning turizm sektori vakillari bilan O‘zbekiston va Ozarbayjon ta’lim muassasalari o‘rtasida turizm sohasida tajriba almashish;
- turizm kunlarini o‘tkazish (mamlakatlarning madaniyati, gastronomiyasi va turizm salohiyati taqdimoti);
- o‘zbekistonlik va ozarbayjonlik sayohatchilar uchun ikki davlat hududlari bo‘ylab yangi turistik yo‘nalishlarni ishlab chiqish va amalga joriy etish.
Izoh (0)